DeepSeek IPO-ya hazırlaşır

    DeepSeek birjaya çıxmağa hazırlaşır. Bloomberg-in məlumatına görə, şirkət artıq ilkin kütləvi səhm təklifinə (IPO) hazırlıq işlərinə başlayıb. Rəsmi müraciət bu ilin sonuna qədər edilə bilər, səhmlərin birjada ticarətinə isə 2027-ci ildə başlanması planlaşdırılır. Bununla yanaşı, DeepSeek IPO-dan əvvəl daha bir böyük investisiya raundu keçirməyi hədəfləyir. Şirkət yeni investorlarla danışıqlar aparır və ən azı 10 milyard yuan (təxminən 1,5 milyard ABŞ dolları) investisiya cəlb etməyi planlaşdırır. Bəzi mənbələrə görə isə bu rəqəm 7,4 milyard dollara qədər yüksələ bilər.

    DeepSeek-in bazar dəyərinin yeni investisiya raundunda 480 milyard yuan (təxminən 71 milyard ABŞ dolları) səviyyəsində qiymətləndirilməsi gözlənilir. Bu isə cəmi altı həftə əvvəlki 50 milyard dollarlıq qiymətləndirmədən təxminən 40 % yüksəkdir. Şirkətin böyümə tempi xüsusilə diqqət çəkir. Aprel ayında ilk dəfə xarici investorlar üçün açılan DeepSeek həmin vaxt təxminən 10 milyard dollar dəyərində qiymətləndirilirdi. Ardınca Tencent və Alibaba kimi nəhənglərin marağı fonunda bu göstərici əvvəlcə 20 milyard, daha sonra 45 milyard, iyunda isə 50 milyard dollara yüksəldi.

    DeepSeek ilk xarici investisiya raundunda fərqli idarəetmə modeli tətbiq edib. Birbaşa səhmlər və səsvermə hüququ yalnız Çinin Milli Süni İntellekt Sənayesi İnvestisiya Fonduna verilib.