DeepSeek R2 süni intellekt modeli GPT-4-ün rəqibi olacaq

     Yeni versiyası hazırlanan DeepSeek süni intellekt modeli haqqında getdikcə daha çox məlumat ortaya çıxır. İnsayderlər bildiriblər ki, Çin şirkətinin neyroşəbəkəsinin təqdimatı avqustdan daha gec bir vaxta təxirə salınacaq - lakin o, çıxış vaxtına qədər ChatGPT ilə rəqabət apara biləcək səviyyədə əhəmiyyətli dərəcədə gücləndiriləcək. The Information-un şirkətə yaxın mənbəyə istinadən verdiyi məlumata görə, DeepSeek R2-nin buraxılışı hesablama resurslarına məhdud çıxış səbəbindən gecikir. Hazırda NVIDIA qrafik sürətləndiricilərini Çinə sərbəst ixrac edə bilmir, buna görə də tərtibatçılar HUAWEI Ascend 910B modelinə keçiblər. Bu model, klaster miqyasında, NVIDIA A100-ün təxminən 91%-i qədər səmərəlilik təmin edir.

     Bundan əlavə, insayderlərin sözlərinə görə, DeepSeek-in baş direktoru Liang Wenfeng modelin hazırkı inkişaf mərhələsindəki məhsuldarlığından hələ də razı deyil. Gözlənilir ki, NVIDIA və AMD-nin ABŞ hökuməti ilə yeni ticarət sazişi fonunda vəziyyət tezliklə yaxşılaşa bilər: şirkətlər gəlirin 15%-ni ödəmək şərtilə çipləri ixrac edə biləcəklər. Qeyri-rəsmi məlumatlara görə, 1.2 trilyon parametrə malik DeepSeek R2, təxminən 1.76 trilyon parametrli GPT-4-ün rəqibi kimi mövqeləndiriləcək. Söhbətlərə görə, neyroşəbəkənin təlimi OpenAI-nin həmin model üçün xərclədiyindən 97% daha ucuz başa gəlib, bu da DeepSeek-ə API vasitəsilə müştərilərə daha aşağı qiymətlə giriş imkanı təklif etməyə şərait yaradacaq. DeepSeek R2-nin dəqiq buraxılış tarixi isə hələ açıqlanmayıb.