DeepSeek süni zəka sahəsində açıq mənbə kodu trendini işə salıb

     Məlumata əsasən Çin süni zəka bazarının oyunçuları - iri şirkətlərdən (məsələn, Baidu) tutmuş daha kiçik oyunçulara (məsələn, Manus AI) qədər - layihələrində açıq mənbə kodlu proqram təminatı üzrə lisenziya modelindən istifadə etməyə getdikcə daha çox meyil göstərirlər. Süni zəka modelləri üçün açıq mənbə kodundan istifadə tendensiyasına, ilin əvvəlində məntiq yürütmə qabiliyyətinə malik R1 modelini təqdim etmiş Çin startapı DeepSeek tərəfindən start verilib. Bu addım süni zəka bazarında ABŞ üstünlüyünə ciddi çağırış və aparıcı texnoloji şirkətlərin səhmlərində enişə səbəb olub.

     Həmçinin DeepSeek-in xeyli aşağı büdcə ilə uğur qazanması, investorlar arasında böyük dil modellərinin hazırlanmasına çəkilən yüksək xərclərlə bağlı suallar doğurub. Bir sıra analitiklərin fikrincə, DeepSeek-in uğurunun bazara ən mühüm təsiri, açıq mənbə kodlu süni zəka modellərinin tətbiqinin sürətlənməsi olub. “DeepSeek-in uğuru sübut edir ki, açıq mənbə strategiyaları daha sürətli innovasiyalara və geniş tətbiqə yol aça bilərlər” - deyə Counterpoint Research şirkətindən Wei Sun bildirib. O əlavə edib ki, DeepSeek modeli artıq bir çox təşkilat tərəfindən tətbiq olunub.

     16 mart tarixində Baidu, öz əsas süni zəka modeli olan Ernie 4.5-in yeni versiyasını, eləcə də məntiq yürütmə qabiliyyətinə malik yeni Ernie X1 modelini təqdim edib və bu modelləri fərdi istifadəçilər üçün pulsuz istifadəyə açıb. Bundan əlavə, Baidu iyun ayının sonunda açıq mənbə kodlu Ernie 4.5 modelləri seriyasını istifadəyə verməyi planlaşdırır. Mütəxəssislər qeyd ediblər ki, Baidu-nun açıq mənbə koduna keçidi, Çin süni zəka bazarında daha geniş bir dəyişiklik tendensiyasının göstəricisidir - bu da proprietar (mülkiyyət hüququna əsaslanan) proqram təminatı lisenziyalaşdırmasına əsaslanan biznes strategiyasından imtinanı nəzərdə tutur.

     Lian Jye Su - Omdia şirkətinin texnologiya üzrə tədqiqat və məsləhət qrupunun baş analitiki - vurğulayıb ki, Baidu həmişə proprietar biznes modelinə sadiq qalıb və açıq mənbə koduna qarşı çıxıb. Lakin DeepSeek kimi şirkətlər sübut etdilər ki, Open Source modellər də proprietar modellər qədər rəqabətədavamlı və etibarlı ola bilərlər. DeepSeek R1 modeli MIT lisenziyası əsasında təqdim olunur. Counterpoint bu lisenziyanı ən əlçatan və geniş yayılmış açıq mənbə lisenziyalarından biri kimi xarakterizə edir - bu lisenziya proqram təminatının limitsiz istifadəsinə, modifikasiyasına və paylanmasına, o cümlədən kommersiya məqsədilə istifadəsinə icazə verir.

     Hərçənd ki, DeepSeek-in süni zəka modeli özü pulsuzdur, startap model və onun imkanlarını digər şirkətlərin tətbiqlərinə inteqrasiya etməyə imkan verən API istifadəsi üçün ödəniş alır. Bununla belə, API qiymətləri OpenAI və Anthropic-in son təklifləri ilə müqayisədə xeyli daha əlçatan olaraq təqdim olunur. Bu şirkətlərin modelləri “bağlı” hesab olunur, çünki onların texniki məlumatları və alqoritmləri ictimaiyyət üçün açıq deyil. Baidu-dan əlavə, digər Çin texnologiya nəhəngləri də Open Source modellər təklif etməyə başlayıblar. Alibaba Cloud ötən ay öz video generasiya edən süni zəka modellərinin mənbə kodunu açdığını bəyan edib.

     Tencent isə mart ayının əvvəlində, mətn və şəkilləri 3D vizuallaşdırmaya çevirə bilən açıq mənbəli 5 yeni süni zəka modeli təqdim edib. Bu tendensiyanı süni zəka sahəsində fəaliyyət göstərən kiçik şirkətlər də izləyir. Çin şirkəti Manus AI, yaxın zamanda OpenAI-nin Deep Research modelini üstələdiyi iddia edilən bir süni zəka agenti təqdim edib və bildirib ki, açıq mənbə koduna keçid edəcək. Çin süni zəka sektorunun aparıcı startaplarından biri olan Zhipu AI isə bu ay WeChat platformasında açıqlama verərək, 2025-ci ilin “açıq mənbə kodu ili” olacağını bəyan edib.

     Ray Wang - Constellation Research şirkətinin baş analitiki və qurucusu - CNBC-yə bildirib ki, şirkətlər DeepSeek-in öz süni zəka modellərini təqdim etməsindən sonra bu addımı atmağa məcbur qalıblar. “DeepSeek pulsuz olduğuna görə, digər Çinli rəqiblər eyni şeyə görə ödəniş tələb edə bilməzlər. Rəqabət apara bilmək üçün açıq mənbə kodlu biznes modellərinə keçməli olacaqlar” - deyə Wang bildirib. Monolith Management texnoloji hedc-fondunun idarəedici partnyoru Tim Wang isə süni zəka bazarında baş verənləri “Android anı” adlandırıb. O, bununla Google-un öz əməliyyat sisteminin mənbə kodunu hamı üçün əlçatan etdiyi dövrü nəzərdə tutur - bu addım Apple-dan fərqli olaraq, innovasiyaların və alternativ tətbiq ekosistemlərinin inkişafına səbəb olmuşdu.

Mənbə: CNBC

Bənzər xəbərlər

Süni İntellekt

OpenAI CEO-su proqramlaşdırma əvəzinə süni zəka alətlərindən istifadəni öyrənməyi məsləhət görüb

OpenAI-nin baş direktoru Sam Altman hesab edir ki, hazırda süni zəka əsaslı alətlərin mənimsənilməsi, proqramlaşdırma öyrənmək istəyənlər üçün əsas vəzifədir.

Süni İntellekt

ChatGPT və digər çat-botlardan daimi istifadə tənhalıq hissini kəskinləşdirə bilər

Bloomberg OpenAI və Massaçusets Texnologiya İnstitutunun araşdırmalarına istinadən yazıb ki, ChatGPT kimi süni zəka çat-botlarından daha tez-tez istifadə edilməsi, insanların özlərini daha tənha hiss etmələrinə və başqaları ilə ünsiyyətə sərf olunan vaxtın azalmasına səbəb ola bilər.

Süni İntellekt

OpenAI tərtibatçılar üçün o1-pro adlı ən bahalı süni zəka modelini təqdim edib

OpenAI özünün o1 adlı süni zəka modelinin daha güclü versiyasını - o1-pro modelini istifadəyə verib və onu API vasitəsilə tərtibatçılar üçün əlçatan edib. Şirkətin bildirdiyinə görə, o1-pro modeli daha çox hesablama gücü istifadə edir və bu da onun daha stabil və keyfiyyətli cavablar verməsinə imkan yaradır.

Süni İntellekt

ABŞ vitse-prezidenti J. D. Vance süni zəkanın tənzimləmədən azad edilməsini faydalı hesab edir

Çərşənbə axşamı, ABŞ-ın vitse-prezidenti J. D. Vance bəyan etdi ki, Trump administrasiyasının süni zəka və texnoloji innovasiyalara verdiyi dəstək həm populistlər, həm də texnologiya sektoruna investisiya qyatıran və onu idarə edənlər üçün faydalı olmalıdır. Vaşinqtonda keçirilmiş Andreessen Horowitz American Dynamism Summit tədbirində çıxış etmiş Vance, süni zəkanın iş yerlərini

Süni İntellekt

Stability AI şirkətinin yeni süni zəka modeli 2D təsvirləri 3D səhnələrə çevirir

Stability AI şirkəti Stable Virtual Camera adlı yeni süni zəka modelini təqdim edib. Şirkətin bəyanatına görə, bu model 2D təsvirləri realistik dərinlik və perspektivlə möhtəşəm videolara çevirmək qabiliyyətinə malikdir.