DeepSeek V3.1 süni intellekt modeli istifadəyə verilib

     Çin şirkəti DeepSeek əvvəlki süni intellekt modeli olan V3-ün yeniləndiyini elan edib. Yeni versiya artıq test üçün əlçatandır. Yenilənmiş modelin əsas üstünlüyü onun genişləndirilmiş kontekst pəncərəsidir. DeepSeek şirkətinin WeChat sosial şəbəkəsindəki rəsmi qrupunda yayımlanmış məlumata görə, V3.1 versiyası daha böyük kontekst pəncərəsinə malikdir, bu isə hər hansı bir sorğu üçün daha çox məlumatın emalını mümkün edir. Bu imkan modelə daha uzun dialoqları dəstəkləməyə və əvvəlki sorğuları yaddaşda daha uzun müddət saxlamağa şərait yaradır.

     DeepSeek yenilənmiş modeli haqqında başqa heç bir əlavə məlumat dərc etməyib. DeepSeek modellərinin sürəti və əlçatanlığı bu şirkətə OpenAI kimi ABŞ şirkətlərinə rəqib olmağa və göstərməyə imkan verdi ki, Çin şirkətləri süni intellekt sahəsində nisbətən az investisiya ilə də irəliləyiş əldə edə bilərlər. Bu ilin əvvəlində təqdim edilmiş DeepSeek R1 modeli bir sıra qərb rəqiblərini standart göstəricilər üzrə geridə qoydu və dərhal böyük məşhurluq qazandı. İndi DeepSeek tərəfdarları R1-in davamı olacaq R2 modelinin çıxışını gözləyirlər. Çin mediası isə gecikmədə NVIDIA sürətləndiricilərinin tədarükündəki problemləri və Huawei-nin süni intellekt sürətləndiricilərinin aşağı səmərəliliyini günahlandırır.