Digg artıq süni intellekt dünyasının xəbər mərkəzi olmaq istəyir

    Technote.az “Engadget” platformasına istinadən bildirir ki, ABŞ-nin bir vaxtlar ən məşhur sosial xəbər platformalarından biri olan Digg yenidən geri qayıdır. Lakin bu dəfə platforma əvvəlki kimi ümumi internet xəbərlərinə deyil, süni intellekt sahəsinə fokuslanıb. Şirkət artıq AI ilə bağlı xəbərləri, müzakirələri və ekspert paylaşımlarını bir araya gətirən yeni aqreqator platformasını istifadəyə verib.

    Digg-in yeni CEO-su Kevin Rose açıqlamasında bildirib ki, internetdə informasiya səs-küyü əvvəlkindən daha çoxdur və əsas məqsəd bu qarışıqlıq içində dəyərli məlumatları istifadəçilərə çatdırmaqdır. Onun sözlərinə görə, süni intellekt hazırda internetin “ən sürətli və ən səs-küylü” sahəsinə çevrilib və Digg məhz bu məlumat axınını süzgəcdən keçirməyi hədəfləyir.

    Hazırda platforma AI sahəsində çalışan, investisiya edən və media məzmunu yaradan təxminən 1000 nəfərin paylaşımlarını izləyir. Siyahıda Sam Altman, Elon Musk, Andrej Karpathy, Jeff Dean, Yann LeCun və Fei-Fei Li kimi tanınmış şəxslər də yer alır. Yeni platforma hazırda alfa mərhələsindədir və di.gg ünvanında fəaliyyət göstərir. Kevin Rose bildirib ki, gələcəkdə layihə yenidən əsas domen olan Digg.com üzərinə köçürüləcək və AI-dan başqa digər mövzular üzrə də xəbər aqreqasiyası ediləcək.