Dünya bankının təqdim etmiş olduğu yeni hesabata əsasən süni zəka növbəti 5 il ərzində bütün dünyadakı iş yerlərinin 1/4 hissəsini tamamilə dəyişəcək. Rəqəmsal texnologiyaların inteqrasiya olunması və ekoloji təmiz enerjiyə keçid kimi faktorlar da həmin iş yerlərinə təsir göstərəcəklər. Dünya bankı mütəxəssisləri güman edirlər ki, süni zəkanın iş yerlərinə inteqrasiya edilməsi əmək bazarına ilkin mərhələdə mənfi təsir göstərəcək. Lakin növbəti 5 il ərzində yeni texnologiyaların əksəriyyətinin əmək bazarına təsiri müsbət nəticələnəcək.

    Analitiklərin fikirlərinə əsasən kibertəhlükəsizlik, big data və davamlı idarəetmə texnologiyaları kimi sahələrdə mütəxəssislərə tələbat dünyadakı məşğulluğun yüksəlməsinə səbəb olacaq əsas faktor olacaq. Hesabatda qeyd edilib ki, ChatGPT kimi texnologiyaların istifadəyə verilməsi ünsiyyət və proseslərin koordinasiyası ilə əlaqəli olan vəzifələrin avtomatlaşdırılmasına və ya əvəz edilməsinə səbəb olacaq. Dünya bankının sorğusunda iştirak etmiş 800 şirkətin 75%-i növbəti 5 il ərzində öz işlərinə süni zəka texnologiyasının inteqrasiya edilməsini hədəflədiyini bildirib.

    Hesablamalara əsasən bu öz növbəsində 26 milyon iş yerinin ixtisar olunmasına gətirib çıxaracaq. İxtisarlar əsasən administrativ və mühasibat vəzifələrində çalışan işçiləri və o cümlədən kassirlər ilə mühasibləri əhatə edəcək. Dünya bankı belə qənaətə gəlib ki, hal hazırda dünyadakı məşğulluğa böyük təhlükə mənbəyi kimi makroiqtisadi faktorlar çıxış edirlər. Buna misal olaraq iqtisadi yavaşlamanı, inflyasiyanı və s. gətirmək olar. Analitiklər hesab edirlər ki, ekoloji təmiz texnologiyalara keçid üçün nəzərdə tutulmuş investisiyalar sayəsində yeni iş yerləri yaratmaq mümkün olacaq.