Elon Musk ilə OpenAI arasında gərginlik artır

    Technote.az “Engadget” platformasına istinadən bildirir ki, Elon Musk ilə OpenAI arasında davam edən hüquqi qarşıdurma daha da gərgin mərhələyə keçib. Şirkət bildirib ki, Musk məhkəmə başlamazdan dərhal əvvəl etdiyi yeni hüquqi addımlarla prosesi bilərəkdən qarışdırmağa çalışır.

    Bloomberg-in məlumatına görə, OpenAI məhkəməyə təqdim etdiyi son sənəddə Elon Musk-ın addımlarını “hüquqi pusqu” kimi xarakterizə edib. Şirkət iddia edir ki, Musk son anda etdiyi dəyişikliklərlə məhkəmə prosesinə xaos qatmağa və ictimaiyyət qarşısında formalaşdırdığı narrativi hüquqi müstəviyə daşımağa çalışır. Məlumata əsasən, bu məhkəmə işi ilk dəfə 2024-cü ildə başlayıb. Həmin vaxt Elon Musk həm OpenAI-ı, həm də Microsoft-u məhkəməyə verərək OpenAI-ın ilkin qeyri-kommersiya missiyasından uzaqlaşdığını, sonradan isə Microsoft ilə əməkdaşlıq və maliyyə dəstəyi nəticəsində kommersiya yönümlü şirkətə çevrildiyini iddia etmişdi.

    Musk son düzəlişində əvvəlki iddiasını dəyişərək, mümkün kompensasiyanın OpenAI-ın qeyri-kommersiya bölməsinə yönəldilməsini istəyib. Bundan əlavə o, OpenAI CEO-su Sam Altman-ın həm rəhbər vəzifədən, həm də direktorlar şurasından uzaqlaşdırılmasını tələb edib. OpenAI isə bu dəyişikliklərin həm hüquqi baxımdan əsassız, həm də faktiki olaraq dəstəklənmədiyini bildirib. Qeyd edək ki, Elon Musk bu məhkəmə çərçivəsində 79 milyard dollardan 134 milyard dollara qədər “qanunsuz qazanc” kompensasiyası tələb edir. Həm OpenAI, həm də Microsoft isə bütün ittihamları rədd edir.