Enterprise AI bazarında yüksəliş: Articul8 500 milyon dollarla qiymətləndirildi

    Technote.az “TechCrunch” platformasına istinadən bildirir ki, Intel-dən ayrılaraq 2024-cü ilin əvvəlində müstəqil fəaliyyətə başlayan müəssisə süni intellekt şirkəti Articul8, 500 milyon dollar dəyərləndirmə ilə planlaşdırılan 70 milyon dollarlıq Series B investisiya raundunun yarısından çoxunu artıq cəlb edib.

    Şirkətin təsisçisi və baş icraçı direktoru Arun K. Subramaniyan TechCrunch-a verdiyi müsahibədə bildirib ki, investisiya raundu iki mərhələdə strukturlaşdırılıb və ilk mərhələyə İspaniyanın vençur fondu Adara Ventures rəhbərlik edir. Raundun ilk hissəsinin məbləği açıqlanmasa da, bütün investisiya prosesinin bu ilin birinci rübündə tamamlanması planlaşdırılır.

    Articul8-in hazırkı dəyərləndirməsi şirkətin 2024-cü ilin yanvarında bağladığı Series A raundundakı 100 milyon dollarlıq post-money qiymətləndirmə ilə müqayisədə təxminən 5 dəfə artım deməkdir. Şirkət bu müddət ərzində 29 ödənişli müştəri ilə ümumilikdə 90 milyon dollardan çox müqavilə dəyərinə (Total Contract Value) çatdığını açıqlayıb. Müştərilər arasında Hitachi Energy, Amazon Web Services, Franklin Templeton və Intel kimi böyük adlar yer alır.