GitHub AI ilə yazılan kodlara görə infrastrukturunu genişləndirib

    “GitHub” süni intellektin (AI) yazdığı kodların sürətlə artması səbəbindən 2026-cı ildə infrastrukturunu xeyli böyüdüb. Artan yükü qarşılamaq üçün sistemə 4 milyon CPU nüvəsi və 160 PB yaddaş sahəsi əlavə olunub. Şəbəkənin məlumat ötürmə gücü də 50 Tb/s artırılıb. Şirkət bunu kod yazan və dəyişiklik göndərən AI agentlərinin sürətlə yayılması ilə əlaqələndirir.

    Koda edilən əlavə və silinmələri qeydə alan “commit”lərin sayı əvvəlki illə müqayisədə 6 dəfə artıb. Apreldə aylıq göstərici 1,4 milyard, avqustda 2,9 milyard olub. Sentyabrda bu rəqəm 7,4 milyarda çatıb. Əsas koda qəbul edilən dəyişiklik paketlərinin, yəni birləşdirilmiş “pull request”lərin sayı da 4 dəfə yüksəlib. Son 12 ayda 17,9 milyard kod göndərişi qeydə alınıb. Bu, 2024 və 2025-ci illərin ümumi nəticəsindən çoxdur.

    2026-cı ilin sentyabrında bütün “pull request”lərin 40%-dən çoxunu AI agentləri başladıb. Martda bu göstərici 17% idi. AI agenti verilən tapşırığa əsasən kod yazan və dəyişiklik göndərən proqramdır. Süni intellektlə yaradılan kod anbarlarında aktivlik əl ilə başladılan layihələrdən 8 dəfə yüksək olub.

    Hər yeni “commit” və ya kod birləşdirməsi CI/CD adlanan avtomatik yoxlamaları başladır. Sistem yarımçıq tapşırıqları tapır, kodun yazılışını vahid formaya salır və sınaqlar keçirir. Beləliklə, yeni kodun əvvəlki funksiyaları və əlaqəli xidmətləri pozub-pozmadığı yoxlanılır. Dəyişikliklərin sayı milyardlarla ölçüldüyündən bu proseslərin davamlı təkrarlanması həm hesablama gücünə, həm də məlumat ötürülməsinə böyük yük salır.

    Yükün sürətlə artması “GitHub”u server sisteminin arxa hissəsini də yenidən qurmağa məcbur edib. Platforma yaddaş sistemlərini hesablama resurslarından mümkün qədər ayırıb. Bunun sayəsində hər hissəni ehtiyaca uyğun ayrıca böyütmək olur. Ancaq aylıq kod dəyişiklikləri indiki sürətlə artmağa davam etsə, hazırkı genişlənmə uzun müddət kifayət etməyə bilər. Bu halda yeni avadanlıq lazım olacaq.