Google Aİ-də xəbər saytlarının spam siyasətinə görə reytinqinin aşağı salınmasını dayandırır

    Google avqustun 30-dan etibarən Avropa İttifaqında fəaliyyət göstərən xəbər nəşrlərinin saytlarında sponsorlu məzmun yerləşdirdiklərinə görə Google Search-də əl ilə cəzalandırılmasına son qoyacaq. Şirkət bu dəyişiklik barədə cümə günü məlumat verib. Reuters-in məlumatına görə, qərar Avropa Komissiyasının Google-a qarşı başlatdığı araşdırmanı həll etmək məqsədi daşıyır. Əks halda şirkət Avropa İttifaqının Rəqəmsal Bazarlar Aktını (DMA) pozduğuna görə böyük məbləğdə cərimə ilə üzləşə bilərdi.

    Google-un açıqlamasına əsasən, 30 avqustdan etibarən manual actions, yəni Google əməkdaşlarının konkret saytlara tətbiq etdiyi əl ilə verilən cəzalar Aİ-nin 27 ölkəsində, həmçinin İslandiya, Norveç və Lixtenşteyndə xəbər saytlarına tətbiq edilməyəcək. Bununla belə, siyasətin özü dünyanın digər bölgələrində dəyişmir. Nəticədə eyni səhifə istifadəçinin yerləşdiyi ölkədən asılı olaraq Google axtarışında fərqli mövqedə görünə bilər.

    Mübahisənin mərkəzində Google-un site reputation abuse siyasəti dayanır. Şirkət bu siyasəti 2024-cü ilin martında tətbiq edib və həmin ilin noyabrında əhatə dairəsini genişləndirib. Siyasət “parazit SEO” adlandırılan təcrübəyə qarşı mübarizə aparır. Burada üçüncü tərəflərin məzmunu yüksək nüfuza malik başqa bir saytın domenində yerləşdirilir və həmin məzmun ev sahibi saytın Google-dakı nüfuzundan faydalanaraq daha yüksək mövqeyə çıxmağa çalışır.

    Lakin xəbər nəşrləri uzun müddətdir ki, bu siyasətin legitim kommersiya fəaliyyətlərini də hədəfə aldığını bildirirlər. Sponsorlu bölmələr, tərəfdaş məzmunlar, affiliate rəyləri və digər kommersiya layihələri media şirkətlərinin adi gəlir mənbələrindən biridir. Nəşrin saytına manual cəza tətbiq edildikdə isə həmin məzmunun Google axtarışındakı görünürlüğü qısa müddət ərzində ciddi şəkildə azala bilər.

    Avropa Komissiyası 12 noyabr 2025-ci ildə məsələ ilə bağlı Rəqəmsal Bazarlar Aktı çərçivəsində araşdırmaya başlayıb. Araşdırmada Google-un bu siyasət vasitəsilə xəbər nəşrlərinin qanuni gəlir əldə etmə üsullarını cəzalandırıb-cəzalandırmadığı araşdırılırdı. Google həmin vaxt araşdırmanı yanlış istiqamətdə atılmış addım kimi qiymətləndirmişdi. Şirkət isə “parazit SEO” ilə bağlı mövqeyini dəyişməyib.

    Google nümayəndəsi Reuters-ə bildirib ki, şirkətin əsas prioriteti istifadəçilər üçün faydalı və keyfiyyətli axtarış nəticələrini qorumaq, həmçinin “parazit SEO” kimi aldadıcı təcrübələrin qarşısını almaqdır.