Google Chrome artıq “AI işçi”yə çevrilir

    Technote.az “TechCrunch” platformasına istinadən bildirir ki, Google iş mühitində istifadə olunan brauzeri daha “ağıllı əməkdaşa” çevirmək üçün Google Chrome üzərinə yeni süni intellekt funksiyaları əlavə edir. Şirkət bu yeniliyi Google Cloud Next tədbiri çərçivəsində təqdim edib.

    Yeni təqdim olunan “auto browse” funksiyası ilə Chrome istifadəçiləri Gemini vasitəsilə açıq tab-lardakı məlumatları anlayaraq müxtəlif tapşırıqları avtomatik yerinə yetirə biləcək. Bu tapşırıqlara səyahət rezervasiyası, məlumatların sistemlərə daxil edilməsi, görüşlərin planlaşdırılması və digər gündəlik iş prosesləri daxildir.

    Google bildirir ki, bu texnologiya məsələn:

• Google Docs sənədindəki məlumatları şirkətin CRM sisteminə ötürə,
• müxtəlif tab-larda qiymət müqayisəsi edə,
• işə qəbuldan əvvəl namizəd haqqında qısa xülasə hazırlaya,
• rəqib məhsulların səhifələrindən vacib məlumatları çıxara bilər.

    Bununla belə, bütün proseslərdə “human in the loop” prinsipi qorunacaq, yəni son qərarı və təsdiqi yenə istifadəçi verəcək.

    Google-un əsas məqsədi təkrarlanan və yorucu işləri avtomatlaşdıraraq əməkdaşların daha strateji işlərə fokuslanmasını təmin etməkdir. Lakin bəzi araşdırmalar göstərir ki, süni intellekt bəzən iş yükünü azaltmaq əvəzinə daha da artırır. Bu səbəbdən yeni yanaşmanın real təsiri hələ tam aydın deyil.

    Google eyni zamanda Chrome Enterprise mühitində təhlükəsizliyi gücləndirir. Yeni sistem:

• icazəsiz AI alətlərini aşkarlaya,
• şübhəli brauzer əlavələrini müəyyən edə,
• “Shadow IT risk detection” vasitəsilə təşkilat daxilində istifadə olunan bütün AI və SaaS xidmətlərinə nəzarət imkanı yaradır.

    Bundan əlavə, IT komandalar üçün Gemini əsaslı xülasələr təqdim olunacaq ki, bu da yenilikləri və təhlükəsizlik dəyişikliklərini daha tez anlamağa kömək edəcək. Google həmçinin Okta ilə əməkdaşlığı genişləndirərək sessiya oğurluğu kimi risklərə qarşı əlavə qoruma tədbirləri təqdim edir. Yeni funksiyalar ilkin mərhələdə ABŞ-də Google Workspace istifadəçiləri üçün aktiv olacaq. Şirkət həmçinin qeyd edir ki, istifadəçilərin daxil etdiyi sorğular AI modellərinin təlimi üçün istifadə olunmayacaq.