Google Cloud rəsmisi şirkətləri AI təhlükəsizliyi ilə bağlı xəbərdar etdi

    Technote.az “TechCrunch” platformasına istinadən bildirir ki, süni intellektin sürətli yayılması şirkətlər üçün yeni təhlükəsizlik riskləri yaradıb. Google Cloud-un COO-su Francis de Souza bildirib ki, şirkətlər AI texnologiyalarına keçid edərkən təhlükəsizliyi sonradan əlavə ediləcək funksiya kimi görməməlidirlər. Onun sözlərinə görə, AI strategiyası data və kibertəhlükəsizlik strategiyası ilə birlikdə hazırlanmalıdır.

    De Souza xüsusilə “shadow AI” adlandırılan problemə diqqət çəkib. Bu, əməkdaşların şirkət nəzarəti olmadan müxtəlif istehlakçı AI alətlərindən istifadə etməsi deməkdir. Onun fikrincə, şirkətlər istifadə etdikləri platformalardan əvvəldən təhlükəsizlik, idarəetmə və audit imkanı tələb etməlidirlər. Google Cloud rəsmisi həmçinin bildirib ki, müasir şirkətlər özlərini tək bulud platformasında işləyən təşkilat kimi görsələr də, reallıqda SaaS tətbiqləri, tərəfdaş sistemləri və müxtəlif inteqrasiyalar səbəbilə çoxbuludlu mühitdə fəaliyyət göstərirlər. Buna görə də təhlükəsizlik yanaşması bütün buludlar, modellər və data sistemləri üzrə vahid şəkildə qurulmalıdır.

    Onun sözlərinə görə, AI dövründə hücum səthi xeyli genişlənib. Artıq yalnız klassik şəbəkə infrastrukturu deyil, modellər, data boru xətləri, agentlər və promptlar da qorunmalı obyektlər sırasına daxildir. De Souza qeyd edib ki, hücumlarda ilkin müdaxilədən növbəti mərhələyə keçid müddəti əvvəlki 8 saatdan 22 saniyəyə qədər azalıb. Bu isə müdafiənin də insan sürəti ilə deyil, maşın sürəti ilə aparılmasını tələb edir.