Google Earth-də AI eksperimenti cəmi bir gün davam etdi

    Google xəritə xidməti Google Earth-ə əlavə etdiyi süni intellekt əsaslı Nano Banana 2 şəkil yaratma funksiyasını istifadəyə verildikdən cəmi bir gün sonra deaktiv edib. Şirkət qərarın səbəbi kimi funksiyadan dezinformasiya məqsədilə istifadə olunmasını göstərib. Yeni funksiya istifadəçilərə müəyyən məkanların tarixi görünüşünü vizuallaşdırmaq, infoqrafikalar hazırlamaq və daşınmaz əmlak layihələrini təsəvvür etmək kimi imkanlar təqdim etmək üçün hazırlanmışdı. Lakin qısa müddətdə bəzi istifadəçilər bu alətdən saxta görüntülər yaratmaq üçün istifadə etməyə başladılar.

    Google əvvəlcə problemin qarşısını almaq üçün yaradılan bütün şəkillərə SynthID rəqəmsal su nişanının əlavə edildiyini və istifadəçilərin Gemini və ya Google Lens vasitəsilə həmin şəkillərin AI tərəfindən yaradılıb-yaradılmadığını yoxlaya biləcəyini bildirmişdi. Şirkət həmçinin zərərli mövzular üzrə şəkil yaradılmasının məhdudlaşdırıldığını da vurğulamışdı. Lakin bu tədbirlər kifayət etmədiyi üçün Google funksiyanı müvəqqəti olaraq dayandırmaq qərarına gəlib.