Google Earth-ə Nano Banana əlavə edildi

    Google süni intellekt əsaslı “Nano Banana” görüntü yaratma alətini Google Earth platformasına inteqrasiya edib. Yeni funksiya istifadəçilərə real məkanları süni intellekt vasitəsilə fərqli dövrlərdə və ya gələcək layihələr formasında vizuallaşdırmağa imkan verir.

    Google-un yeni funksiyanı təqdim edərkən önə çıxardığı əsas imkanlardan biri “keçmişi vizuallaşdırmaqdır”. Məsələn, müəllim və ya şagird Google Earth-də Pompey xarabalıqlarının eramızın 78-ci ilində necə görünə biləcəyini süni intellekt vasitəsilə yarada bilər. Nano Banana müasir xarabalıqların görüntüsünü Roma imperiyası dövrünün küçələrini təsvir edən süni intellekt görüntüsünə çevirir. Lakin burada vacib məqam yaradılan tarixi görüntülərin real fotoşəkillər və ya həmin dövrə aid dəqiq vizual məlumatlar olmadığıdır. Süni intellekt mövcud məlumatlar əsasında ehtimal edilən görüntü yaradır. Buna görə nəticələr tarixi baxımdan tam dəqiq olmaya bilər.

    Google yeni funksiyanın daşınmaz əmlak və memarlıq sahəsində də istifadə edilə biləcəyini bildirir. Məsələn, boş torpaq sahəsinin gələcəkdə ticarət mərkəzi, yaşayış kompleksi və ya başqa layihə tikildikdən sonra necə görünə biləcəyini Google Earth üzərində vizuallaşdırmaq mümkündür. Şirkət bunun layihələri tikintiyə başlamazdan əvvəl müştərilərə nümayiş etdirmək üçün faydalı ola biləcəyini düşünür.