Google Gemini-də pulsuz istifadəçilərin model seçimini məhdudlaşdıracaq

    “Google” oktyabrın 9-dan “Gemini” tətbiqində pulsuz istifadəçilər üçün model seçimini məhdudlaşdıracaq. “Google AI” abunəliyi olmayanlar yalnız “Flash-Lite 3.5” modelindən yararlana biləcəklər. Həmin tarixdən onların “Flash 3.6” və “Pro 3.1” modellərinə çıxışı bağlanacaq. Şirkət mayda hesablama yükünə görə istifadə limitlərini dəyişmişdi.

    Aylıq 4,99 dollar (təxminən 8 manat) ödəyən “AI Plus” abunəçilərinin də seçimi azalacaq. Paketdə “Flash-Lite” və “Flash” qalacaq, “Pro” modelindən isə istifadə etmək olmayacaq. “Google” dəyişikliklərin dəqiq vaxtını abunəçilərə elektron məktubla açıqlayacaq.

    “AI Pro” və “AI Ultra” paketlərində imkanların azaldılması planlaşdırılmır. Əksinə, aylıq 19,99 dollar (təxminən 34 manat) olan “AI Pro” paketinə “Deep Think” seçimi əlavə ediləcək. Bir neçə düşünmə yolunu eyni vaxtda işlədən bu seçim hazırda yalnız aylıq 99,99 dollar (təxminən 170 manat) və 199,99 dollar (təxminən 340 manat) paketlərində var.

    Oktyabrda “Gemini” tətbiqində hər model üçün “low”, “medium” və “high” adlı düşünmə səviyyələrinin açılacağı gözlənilir. Yüksək səviyyədə tapşırıqlar daha ətraflı işlənəcək və cavablar daha dolğun olacaq. Ancaq bu halda istifadəçinin sorğu limiti daha tez tükənəcək. Hazırda tətbiqdə mürəkkəb məsələlər üçün yalnız “Extended thinking” seçimini aktivləşdirmək olur. Eyni 3 pilləli seçim “Google AI Studio” və “Antigravity” xidmətlərində artıq var.

    Yeni “Gemini 4 Argon” modelinin bu bölgüdə hansı pilləyə daxil ediləcəyi hələ açıqlanmayıb. “Google” əvvəlcə modeli “AI Ultra” abunəçilərinə açacağını deyib. Lakin “Argon”un “Pro” kimi qiymətləndiriləcəyi, yoxsa daha yuxarı yeni paketə daxil ediləcəyi bilinmir. Digər paketlərin modelə nə vaxt çıxış əldə edəcəyi də dəqiqləşməyib.