Google Gemini modelləri üçün daha səmərəli süni intellekt çipi hazırlayır

    Google-un daxili Gemini süni intellekt modellərinin daha səmərəli işləməsi üçün yeni server çipi üzərində çalışdığı bildirilir. The Information-un anonim mənbələrə istinadən yaydığı məlumata görə, şirkət daxilində “Frozen v2” adlandırılan yeni çipin 2028-ci ildə istifadəyə verilməsi planlaşdırılır. Məlumata əsasən, çip enerji sərfiyyatına nisbətdə yaradılan tokenlərin sayı baxımından Google-un mövcud süni intellekt çiplərindən 6-10 dəfə daha səmərəli ola bilər.

    Google isə TechCrunch-a açıqlamasında xəbəri birbaşa təsdiqləməyib və təkzib də etməyib. Şirkət bildirib ki, istifadəçilər və müştərilər üçün maksimum performans və səmərəliliyi təmin etmək məqsədilə komandalar daim yeni texnologiyalar üzərində araşdırmalar aparır və müxtəlif innovasiyaları sınaqdan keçirir. Google həmçinin qeyd edib ki, bütün layihələr istehsala çatmasa da, bu araşdırmalar şirkətin aparat və proqram təminatını birlikdə hazırlayaraq real iş yükü üçün optimallaşdırmaq strategiyasının əsas hissəsidir.

   Süni intellekt şirkətləri son dövrlərdə öz çiplərini hazırlamağa daha çox maraq göstərirlər. Bunun əsas səbəbləri arasında daxili AI modellərinin daha səmərəli işləməsini təmin etmək və süni intellekt hesablama gücünə olan qlobal tələbatın yaratdığı çip çatışmazlığını aradan qaldırmaq yer alır. Çiplərin səmərəliliyi də texnologiya şirkətləri üçün getdikcə daha vacib satış üstünlüyünə çevrilir. Buna səbəb süni intellektə çəkilən böyük xərclərlə bağlı narahatlıqların artmasıdır. Eyni zamanda, şirkətlər süni intellekt çipləri bazarında uzun müddətdir dominant mövqedə olan Nvidia-dan asılılığı azaltmağa çalışırlar.

     İyun ayında OpenAI özünün ilk xüsusi çipini, “Jalapeño” adlı inferens prosessorunu elan edib. Bu ayın əvvəlində isə Anthropic şirkətinin Samsung ilə yeni çip istehsalı üzrə tərəfdaşlıq imkanlarını müzakirə etdiyi barədə məlumat yayılıb. Alphabet-in süni intellekt strategiyasını inkişaf etdirmək üçün planlaşdırdığı böyük investisiyalar daha əvvəl investorlar arasında narahatlıq yaradıb. Google ilin əvvəlində AI strategiyasını dəstəkləmək üçün 180-190 milyard dollar xərcləməyi planlaşdırdığını açıqlamışdı. Bu qədər böyük maliyyə vəsaiti yatırıldığı üçün şirkət həmin investisiyaların gələcəkdə nəticə verəcəyini sübut etməlidir.

     “Frozen v2” çipinin gözləniləndən daha yüksək səmərəliliyi ilə bağlı xəbərlər isə investorların müsbət reaksiyasına səbəb olub. The Information-un məlumatından sonra Google-un səhmləri bazar ertəsi səhər saatlarında təxminən 3 % bahalaşıb.