Google Gemini “Personal Intelligence” funksiyasını istifadəyə verdi

    Technote.az “The Verge” platformasına istinadən bildirir ki, Gemini süni intellekti “Personal Intelligence” adlı yeni funksiya ilə daha da fərdiləşdirilib. Bu funksiya Gemini-yə istifadəçinin əvvəlki söhbətlərini xatırlamağa və Gmail, Calendar, Photos, axtarış tarixçəsi kimi Google xidmətlərindəki məlumatlara avtomatik baxmağa imkan verir.

    Funksiya tamamilə opt-in rejimindədir. Yəni istifadəçi hansı tətbiqlərə icazə verəcəyini özü seçir. Hazırda beta mərhələsindədir və yalnız AI Pro və Ultra abunəçiləri üçün əlçatandır. Əslində Gemini daha əvvəl də Workspace tətbiqləri ilə inteqrasiya təklif edirdi. Ancaq fərq ondadır ki, əvvəl istifadəçi açıq şəkildə “email-lərimə bax” və ya “təqvimimdən yoxla” deməli idi. İndi isə Gemini sorğunu özü analiz edir və lazım olduğunu düşünərsə, məsələn, konsert bileti ilə bağlı email-i avtomatik tapır. Bu, Gemini-ni sadə səsli köməkçi olmaqdan çıxarıb real “şəxsi assistent” səviyyəsinə yaxınlaşdırır.

    Testlər zamanı Gemini istifadəçinin maraqlarını olduqca dəqiq anlayır. Kitab tövsiyələri gözləniləndən daha uyğun çıxır, həyət və bağ planlaması kimi mövzularda isə təkcə məsləhət vermir, eyni zamanda təqvimə xatırlatma əlavə edir və Google Keep-də alış siyahısı yaradır. Halbuki bir neçə ay əvvəl belə tapşırıqlar tez-tez uğursuz olurdu. Bununla belə, problemlər hələ də qalır. Məsələn, velosiped marşrutları və ya şəhər gəzintisi üçün məkan tövsiyələrində Gemini xırda, amma kritik səhvlər edir. Səhv ünvanlar göstərir, mövcud olmayan məkanları aktiv kimi təqdim edir və ya təhlükəli yollar təklif edir. Nəticədə istifadəçi yenə də hər detalı yoxlamalı olur.

    Nəticə olaraq, Personal Intelligence Gemini-ni daha faydalı edir, amma onu tam etibarlı gündəlik bələdçiyə çevirmir. İlkin planlama üçün yaxşıdır, lakin son qərar verməzdən əvvəl insan faktoru hələ də vacib olaraq qalır.