Google Home üçün Gemini 3.1 təqdim edildi

    Technote.az “The Verge” platformasına istinadən bildirir ki, Google şirkəti ağıllı ev platforması olan Google Home üçün Gemini süni intellekt köməkçisini yeniləyib. Yeni Gemini 3.1 versiyası sayəsində istifadəçilər artıq daha mürəkkəb və çoxmərhələli əmrləri bir anda səslə idarə edə biləcəklər.

    Yenilənmədən sonra istifadəçilər bir cümlə daxilində bir neçə əmri birlikdə verə bilirlər. Məsələn, istifadəçi eyni anda həm işıqları söndürməyi, həm temperaturu dəyişməyi, həm də təhlükəsizlik kamerasını aktivləşdirməyi tələb edə bilər. Sistem bu əmrləri daha dəqiq anlayaraq yerinə yetirəcək. Google bildirir ki, Gemini 3.1 xüsusilə təkrarlanan hadisələri, bütün gün davam edən tədbirləri və planlaşdırılmış hadisələrin vaxtını dəyişdirməyi daha yaxşı idarə edə bilir. Bu isə ağıllı ev ekosistemində daha təbii və insan dilinə yaxın idarəetmə təcrübəsi təqdim edir.

    Şirkət ötən ay da Gemini for Home sistemini yeniləmişdi. Həmin yeniləmə cihazların düzgün tanınması və təbii danışıq dilinin daha yaxşı başa düşülməsi kimi imkanları inkişaf etdirmişdi. Çünki son dövrlərdə bəzi istifadəçilər sistemin kameralardakı heyvanları səhv tanıması və fəaliyyət xülasələrində dəqiqlik problemləri yaşaması ilə bağlı şikayətlər edirdilər.

    Yeniliklər arasında “Ask Home on Web” adlı funksiyanın ictimai test versiyası da yer alır. Bu funksiya istifadəçilərə kompüter üzərindən ağıllı ev cihazlarını idarə etməyə imkan verəcək. İstifadəçilər təbii dil vasitəsilə kamera tarixçəsində axtarış edə, cihazların vəziyyətini yoxlaya və avtomatlaşdırma ssenariləri yarada biləcəklər.

    Bundan əlavə, Google bildiriş sistemini də yeniləyir. Yeni bildirişlərdə cihazları birbaşa idarə etməyə imkan verən “quick action” düymələri olacaq. Bu isə istifadəçilərin tətbiqi açmadan müəyyən funksiyaları idarə etməsini asanlaşdıracaq.