Google süni intellekt yarışını sürətləndirir

     Technote.az “TechCrunch” platformasına istinadən bildirir ki, Google Cloud süni intellekt sahəsində rəqabəti gücləndirmək üçün yeni nəsil çiplərini təqdim edib. Şirkət səkkizinci nəsil Tensor Processing Unit (TPU) seriyasını iki fərqli istiqamətə bölüb: TPU 8t model təlimi üçün, TPU 8i isə inferensiya, yəni istifadəçilərin sorğularından sonra modelin işləmə mərhələsi üçün nəzərdə tutulub.

    Google-un açıqlamasına görə, yeni çiplər əvvəlki nəsillə müqayisədə 3 dəfə daha sürətli təlim, 80 % daha yaxşı qiymət-performans nisbəti və 1 milyondan çox TPU-nun eyni klasterdə işləməsi kimi üstünlüklər təqdim edir. Bu isə daha az enerji sərfi ilə daha yüksək hesablama gücü deməkdir.

    Bununla belə, bu addım Nvidia üçün birbaşa təhlükə kimi qiymətləndirilmir. Google və digər texnologiya nəhəngləri öz çiplərini əsasən Nvidia əsaslı sistemləri tam əvəz etmək üçün yox, onları tamamlayan alternativ kimi istifadə edir. Hətta Google yaxın zamanda Nvidia-nın ən yeni Vera Rubin çiplərini də öz bulud xidmətlərinə əlavə edəcəyini bildirib.

    Ekspertlər hesab edir ki, uzunmüddətli perspektivdə bu texnologiya nəhəngləri öz çiplərinə daha çox üstünlük verə bilər. Lakin hazırkı vəziyyətdə Nvidia bazarda dominant mövqeyini qoruyur və bu sahədə liderliyini davam etdirir.

     Bundan əlavə, Google və Nvidia əməkdaşlığı da gücləndirir. İki şirkət birlikdə bulud sistemlərində performansı artırmaq üçün “Falcon” adlı açıq mənbəli şəbəkə texnologiyasını inkişaf etdirir.