Google süni intellektlə araşdırmaları qısa videolar şəklində təqdim etməyə başlayıb

    Google süni intellektlə işləyən qeydlər və araşdırma platforması olan NotebookLM üçün yeni funksiyanı istifadəyə verib. Yenilik sayəsində istifadəçilər platformaya yüklədikləri mənbələrin qısa xülasəsini 60 saniyəlik, şaquli formatda hazırlanmış videolar şəklində əldə edə biləcəklər.

    Yeni funksiya hazırda Google AI Pro və Google AI Ultra abunəçiləri üçün istifadəyə verilir. Google-un paylaşdığı nümunədə sistem Avstraliyanın emulara qarşı uğursuz mübarizəsini izah edən mənbələri analiz edərək, süni intellekt tərəfindən yaradılmış şəkillər və səsli narrasiya ilə qısa video hazırlayıb. Bu funksiya NotebookLM-in artıq təqdim etdiyi digər imkanları – süni intellekt podkastları, sinematik videolar və vizual izahlar tamamlayır.

    İstifadəçilər 60 saniyəlik videonu yaratmaq üçün NotebookLM-in veb və ya mobil tətbiqində istədikləri qeydlər dəstini açmalı, sağ tərəfdə yerləşən "Studio" bölməsindən "Video" seçimini etməli və daha sonra "Short" formatını seçərək videonun hansı mövzuya fokuslanacağını müəyyənləşdirməlidirlər. Bundan sonra "Generate" düyməsini sıxmaq kifayətdir.

    Hazırda funksiya yalnız ingilis dilini dəstəkləyir. Google bildirib ki, yaxın zamanda bu imkan ödənişsiz istifadəçilər üçün də əlçatan olacaq.