Google-un süni intellekt xidmətləri 1 ay ərzində kvadrilyon sayda token emal edib

     Google bildirib ki, onun süni intellekt xidmətləri iyun ayında demək olar ki, kvadrilyon sayda token emal edib. Tokenlər dedikdə, süni intellekt modellərinin öyrənmə və generasiya zamanı emal etdikləri məlumat vahidləri nəzərdə tutulur ki, bu da Google-un müvafiq xidmətlərindən istifadə miqyası barədə təsəvvür yaradır. Tokenlərə mətn, şəkillər, audio fayllar, videolar və digər məlumat növləri daxil ola bilər. Google-un generativ süni intellekt sahəsindəki rəqibi olan OpenAI-nin məlumatına görə, bir token adətən 4 ingilis hərfinə bərabərdir və bir abzas orta hesabla 100 tokeni əks edir. Məsələn, ABŞ-ın Müstəqillik Bəyannaməsinin mətni 1695 token təşkil edir.

     “Ötən ay biz demək olar ki, 1 000 000 000 000 000 token emal etdik ki, bu da may ayı ilə müqayisədə 2 dəfədən çoxdur” - deyə Google DeepMind şirkətinin baş direktoru Demis Hassabis sosial şəbəkə X-də açıqlama verib. Emal edilmiş tokenlərin sayının artması mütləq süni intellekt xidmətlərinin istifadəçi sayının artdığı mənasına gəlmir, lakin bu, aydın şəkildə göstərir ki, məntiqi düşünmə qabiliyyətinə malik süni intellekt modelləri hər istifadə zamanı daha çox məlumat emal edirlər. Google məntiqi çıxarışlar üçün nəzərdə tutulmuş Gemini 2.5 model ailəsinin tətbiqinə mart ayının sonunda başlayıb. Emal olunan tokenlərin həcminin artması məlumat emalı mərkəzlərinin infrastrukturunun genişləndirilməsini tələb edir. Bu ay Google bildirib ki, məlumat mərkəzlərinə kapital xərclərinin 10 milyard dollar artaraq illik 85 milyard dollara çatacağı gözlənilir.

     “Hesablama texnologiyalarında əsas məsələ öyrənmə üçün tələb olunan resursların həcmdir. Bu resursları tez-tez bir yerdə cəmləmək lazımdır, çünki məlumat mərkəzləri arasında ötürmə qabiliyyətindəki məhdudiyyətlər səmərəliliyə təsir göstərə bilər. Hazırda süni intellekt sistemləri dünya üzrə milyardlarla insanın istifadə etdiyi məhsullara inteqrasiya olunur və cavabların generasiyası üçün nəhəng hesablama gücü tələb edir. Bundan əlavə, süni intellekt sahəsində yeni bir tendensiya - məntiqi düşünən modellər - getdikcə daha çox aktuallaşır. Belə modellər nə qədər çox düşünməyə vaxt ayrılırsa, bir o qədər ağıllı davranırlar. Bütün bunlar daha çox resurs tələb edir və bu istiqamətdə hər hansı yavaşlama əlaməti görmürəm. Süni intellekt sistemləri təkmilləşdikcə daha faydalı və tələbatlı olacaqlar” - deyə Demis Hassabis bildirib.