Google–Accel AI proqramı minlərlə müraciətdən yalnız 5 startapı seçdi

     Technote.az “TechCrunch” platformasına istinadən bildirir ki, süni intellekt sahəsində yaranan bir çox startap ideyası hələ də mövcud AI modellərinin üzərinə sadəcə əlavə funksiyalar qoyan “wrapper” layihələrindən ibarətdir. Lakin AI modelləri getdikcə daha çox imkan qazandıqca investorlar bu tip startaplara daha ehtiyatla yanaşmağa başlayır.

    Bunun ən son nümunəsi Google və vençur kapital şirkəti Accel tərəfindən Hindistanda təşkil edilən birgə AI akselerator proqramıdır. Proqram üçün təqdim olunan 4 mindən çox müraciətin böyük hissəsi “wrapper” ideyalarından ibarət olsa da, seçilən 5 startapın heç biri bu kateqoriyaya daxil deyil. Bu barədə Accel tərəfdaşı Prayank Swaroop bildirib.

    Noyabr ayında elan edilən və AI fokuslu olan Atoms proqramı Hindistanla əlaqəli süni intellekt məhsulları hazırlayan erkən mərhələli startapları dəstəkləməyi hədəfləyir. Proqrama seçilən startaplar Accel və Google-un AI Futures Fund fondundan 2 milyon dollara qədər investisiya, həmçinin Google-dan 350 min dollara qədər bulud və AI hesablaması krediti əldə edəcəklər.

    Swaroopun sözlərinə görə, qəbul edilməyən müraciətlərin təxminən 70 %-i “AI wrapper” layihələri idi. Bu startaplar mövcud proqramların üzərinə çatbot kimi AI funksiyaları əlavə etsələr də, süni intellektdən istifadə edərək yeni iş axınları və ya sistemlər yaratmırdılar.

   Qəbul edilməyən digər layihələrin bir hissəsi isə artıq çox rəqabətli sahələrdə fəaliyyət göstərirdi. Məsələn, marketinq avtomatlaşdırılması və AI əsaslı işə qəbul alətləri kimi sahələr investorlar üçün kifayət qədər fərqləndirici görünmürdü. Bu il proqram əvvəlki Atoms cohort-ları ilə müqayisədə təxminən 4 dəfə çox müraciət alıb və müraciət edənlərin böyük hissəsi ilk dəfə startap quran təsisçilərdən ibarət olub.

    Hindistanda inkişaf edən AI ekosistemi əsasən şirkətlər üçün nəzərdə tutulmuş proqramlara fokuslanır. Müraciətlərin 62 %-i məhsuldarlıq alətləri, 13 %-i isə proqramlaşdırma və inkişaf alətləri ilə bağlı olub. Yəni ümumilikdə müraciətlərin təxminən 75 %-i enterprise proqram ideyaları idi. Swaroop isə xüsusilə səhiyyə və təhsil sahələrində daha çox layihə görmək istədiyini bildirib.