Gracenote OpenAI-ı müəllif hüquqlarını pozmaqda ittiham edərək məhkəməyə verdi

    Technote.az “Engadget” platformasına istinadən bildirir ki, Nielsen şirkətinə məxsus olan metadata şirkəti Gracenote süni intellekt sahəsində fəaliyyət göstərən OpenAI şirkətini müəllif hüquqlarını pozmaqda ittiham edərək məhkəməyə verib.

    ABŞ mediasının məlumatına görə, Gracenote iddia edir ki, OpenAI şirkəti onların yaratdığı məlumat bazasından və həmin məlumatların quruluşundan icazəsiz istifadə edib. Şirkət bildirir ki, bu məlumatlar OpenAI-ın süni intellekt məhsullarının hazırlanması zamanı istifadə olunub və bunun üçün heç bir ödəniş edilməyib. Gracenote əsasən film, serial və digər əyləncə məzmunları haqqında metadata, yəni təsvirlər, identifikasiya kodları və məzmunu tapmağa kömək edən strukturlaşdırılmış məlumatlar yaradır. Bu məlumatlar televiziya platformaları və rəqəmsal xidmətlər tərəfindən istifadəçilərə məzmunu daha rahat tapmaq üçün tətbiq olunur.

    Son bir ildə süni intellekt şirkətlərinə qarşı açılan bir çox məhkəmə iddiası əsasən süni intellekt modellərinin təlimi üçün istifadə olunan məzmunla bağlı olub. Lakin Gracenote-un iddiası fərqli bir məqamı da əhatə edir. Şirkət yalnız məlumatların özünün deyil, həm də həmin məlumatların strukturunun və əlaqələndirmə sisteminin icazəsiz istifadə edildiyini bildirir. Şirkətin məhkəməyə təqdim etdiyi şikayətdə qeyd olunur ki, OpenAI istəsəydi Gracenote-dan məlumatların istifadəsi üçün lisenziya ala bilərdi və ya yalnız ictimai istifadəyə açıq məlumatlarla işləyə bilərdi. Lakin iddiaya görə, OpenAI bu variantların heç birini seçməyib və Gracenote məlumatlarından icazəsiz şəkildə istifadə edib. Gracenote həmçinin bildirir ki, əvvəllər OpenAI ilə lisenziya razılaşması əldə etmək üçün cəhdlər etsə də, bu təşəbbüslər ya cavabsız qalıb, ya da qəbul edilməyib.