Grok qalmaqalı böyüyür: xAI-ın süni intellekti ölkələr tərəfindən bloklanır

    Technote.az “The Verge” platformasına istinadən bildirir ki, xAI tərəfindən hazırlanan Grok son həftələrdə dünya miqyasında ciddi qalmaqala səbəb olub. Xüsusilə real insanların, o cümlədən qadınların və azyaşlı uşaqların razılığı olmadan deepfake görüntülərinin yaradılması hökumətlərin və tənzimləyici qurumların diqqətini cəlb edib.

    Grok ilk dəfə 2023-cü ilin noyabrında təqdim olunarkən “üsyankar”, “spicy” suallara cavab verən və digər çatbotların imtina etdiyi mövzulara açıq olan bir AI kimi təqdim edilmişdi. Sistem eyni zamanda real vaxt rejimində X platformasındakı məlumatlara çıxış imkanı ilə fərqlənirdi. Lakin bu “azadlıq” ciddi təhlükəsizlik boşluqları ilə müşayiət olundu. Elon Musk 2022-ci ildə Twitter-i satın aldıqdan sonra platformanın təhlükəsizlik və etibar komandasında kütləvi ixtisarlar aparılıb. Avstraliyanın onlayn təhlükəsizlik qurumunun məlumatına görə, X-in təhlükəsizlik mühəndislərinin sayı təxminən 80 % azaldılıb. Grok istifadəyə verildikdən sonra isə xAI-da ümumiyyətlə ayrıca təhlükəsizlik komandasının olub-olmaması belə aydın deyildi.

    Problemlər xüsusilə Grok-a “edit” funksiyası əlavə edildikdən sonra kəskinləşdi. Bu funksiya istifadəçilərə başqasının paylaşdığı şəkli onun icazəsi olmadan dəyişdirməyə imkan verirdi. Aparılan 24 saatlıq monitorinqə əsasən, Grok saatda təxminən 6 700-dən çox “nudifying” tipli görüntü yarada bilirdi. Bu isə artıq texnoloji yox, hüquqi və etik böhran kimi qiymətləndirilməyə başladı. Hadisələrdən sonra Fransa, Hindistan və Malayziya rəsmi araşdırmalara başladı. ABŞ-nin Kaliforniya ştatının qubernatoru məsələ ilə bağlı prokurorluğa çağırış etdi. Böyük Britaniya isə razılıq olmadan yaradılan AI görüntülərini qadağan edən yeni qanun üzərində işlədiyini açıqladı. Nəticədə Malayziya və İndoneziya Grok-a girişi tam blokladı.

    Qarşıdakı aylarda həm ABŞ-də, həm də Avropada qanunvericiliyin sərtləşməsi və xAI üçün daha ciddi nəticələrin ortaya çıxması gözlənilir.