Grok qalmaqalından sonra Avropa AI qanununu sərtləşdirir

    Technote.az “TNW” platformasına istinadən bildirir ki, Avropa Parlamenti üzvləri 11 mart 2026-cı il tarixində AI Act qanununa ediləcək dəyişikliklər üzrə siyasi razılıq əldə ediblər. Yeni razılaşmaya əsasən, insanların razılığı olmadan süni intellekt vasitəsilə yaradılan “deepfake” görüntülər Avropa İttifaqında açıq şəkildə qadağan ediləcək.

    Bu qərar əsasən xAI şirkətinin hazırladığı və X platformasına inteqrasiya edilmiş Grok çatbotu ilə bağlı qalmaqaldan sonra gündəmə gəlib. 2025-ci ilin dekabrında Grok-a əlavə olunan yeni şəkil redaktə funksiyası istifadəçilərə real insanların fotolarını dəyişdirərək seksual xarakterli görüntülər yaratmağa imkan verirdi. Qısa müddətdə bu alət qızların razılığı olmadan onların “deepfake” intim şəkillərini hazırlamaq üçün istifadə olunmağa başladı. Araşdırma təşkilatı AI Forensics yalnız 5–6 yanvar 2026 tarixləri arasında bu alətlə təxminən 6700 belə seksual görüntünün yaradıldığını açıqlayıb. Tənzimləyicilər bəzi materialların azyaşlıları təsvir etdiyini və bunun uşaq cinsi istismar materialı hesab oluna biləcəyini bildiriblər.

    Hadisədən sonra Avropa Komissiyası platformaya qarşı araşdırma başladıb və Digital Services Act çərçivəsində X şirkətindən bütün daxili məlumat və sənədləri 2026-cı ilin sonuna qədər saxlamasını tələb edib. Bu qanuna əsasən, platformalar qaydaları pozarsa, onların qlobal illik gəlirinin 6 %-nə qədər cərimə tətbiq edilə bilər.