Hindistanın ilk AI şirkətinin birja çıxışı zəif başladı

    Technote.az “TechCrunch” platformasına istinadən bildirir ki, Hindistanın birjaya çıxan ilk süni intellekt şirkəti olan Fractal Analytics üçün IPO debütü gözlənildiyi qədər uğurlu olmadı. Şirkətin səhmləri bazara çıxarılan ilk günündə investorların ehtiyatlı mövqeyi ilə üzləşdi və texnologiya sektorunda son dövrlərdə yaşanan satış dalğasının təsiri hiss olundu.

    2025-ci ilin iyul ayında Fractal 170 milyon dollarlıq ikinci dərəcəli satış həyata keçirərək 2,4 milyard dollar dəyərində qiymətləndirilmişdi. Şirkət ilk dəfə 2022-ci ilin yanvarında 360 milyon dollarlıq investisiya cəlb edərək 1 milyard dollar həddini keçmiş və Hindistanın ilk “AI unicorn”u statusunu qazanmışdı.

    IPO öncəsi şirkət təklifin həcmini də ciddi şəkildə azaltmışdı. 2000-ci ildə yaradılan Fractal uzun illər data analitikası sahəsində fəaliyyət göstərib. Şirkət yalnız 2022-ci ildən etibarən biznes modelini daha aqressiv şəkildə süni intellekt həllərinə yönəldib. Bu gün Fractal maliyyə xidmətləri, pərakəndə satış və səhiyyə sektorunda iri müəssisələr üçün AI və data analitikası proqram təminatı təqdim edir və gəlirlərinin böyük hissəsini ABŞ başda olmaqla xarici bazarlardan əldə edir.