Hollivudun süni intellektlə yaxınlaşması gözləntiləri doğrultmadı

    Technote.az “The Verge” platformasına istinadən bildirir ki, 2025-ci il Hollivud üçün süni intellektlə daha sıx əməkdaşlıq ili oldu. Əslində, AI texnologiyaları illərdir ki, film sənayesində aktyorların cavanlaşdırılması, yaşıl fonların silinməsi və post-prodakşn proseslərində köməkçi alət kimi istifadə olunurdu. Lakin 2025-ci ildə studiyalar daha çox mətn-video (text-to-video) əsaslı generativ AI alətlərinə yönəldi və nəticələr gözləntiləri doğrultmadı. Əvvəlcə böyük studiyalar AI şirkətlərini müəllif hüquqlarını pozmaqda ittiham edərək məhkəməyə vermişdi. Disney, Universal Pictures və Warner Bros. Discovery kimi nəhənglər modellərin lisenziyasız məzmun üzərində öyrədildiyini iddia edirdi. Amma sonradan bu şirkətlərin bir qismi mövqeyini dəyişərək AI istehsalçıları ilə əməkdaşlığa başladı.

    Kiçik startaplar da bu prosesdə fəallaşdı. Aktrisa Natasha Lyonne-un yaratdığı Asteria və Amazon-un dəstəklədiyi Showrunner kimi platformalar AI ilə film və animasiya istehsalını “ucuz və sürətli” alternativ kimi təqdim etdilər. Lakin bu layihələrin əksəriyyəti ictimaiyyətə real dəyər göstərə bilmədi və keyfiyyət baxımından ciddi tənqid olundu. Ən diqqətçəkən addımlardan biri Disney və OpenAI arasında bağlanan 3 illik, milyard dollarlıq razılaşma oldu. Bu razılaşmaya əsasən, OpenAI-ın Sora platformasında Star Wars, Marvel və digər məşhur françayzlara aid 200-dən çox personajdan istifadə edilə biləcək.

    Bu tendensiyaya Netflix və Amazon da qoşuldu. Netflix vizual effektlərdə AI-dan istifadə etdiyini açıq elan etdi. Amazon isə insan dublyajı olmadan AI ilə səsləndirilmiş anime serialları yayımladı, lakin ciddi səhvlər səbəbindən bu məzmunları geri çəkməyə məcbur qaldı.