Instacart ərzaq sifarişi üçün süni intellekt köməkçisini istifadəyə verib

    “Instacart” ərzaq alışını planlaşdırmaq üçün “Clementine” adlı süni intellekt köməkçisini istifadəyə verib. Yeni funksiya söhbətdə yazılan istəyi, ərzaq siyahısını və ya resepti birbaşa sifarişə hazır səbətə çevirir. Köməkçi ABŞ və Kanadada əlçatandır. O, “Instacart Marketplace” daxilində işləyir və istifadəçiyə nə bişirəcəyini seçərkən büdcəni də nəzərə alır.

    “Clementine” gündəlik danışıq dilində yazılan tapşırıqları anlayır. Məsələn, istifadəçi 2 nəfərlik asan və yüksək zülallı şam yeməyi istədikdə köməkçi resept və lazım olan ərzaqları göstərir. Siyahı seçilmiş mağazada həmin vaxt satılan məhsullara əsasən hazırlanır. Məhsulları səbətə 1 toxunuşla əlavə etmək mümkündür. İstifadəçi evində olan ərzaqları siyahıdan çıxarıb qalanlarını sifariş edə bilər.

    “Clementine” istifadəçiyə uyğun reseptlər hazırlaya, həmçinin etibarlı mənbələrdən reseptlər təklif edə bilir. Seçimlər bölməsində vegetarian, çərəzsiz, qlütensiz və ya yalnız orqanik məhsullardan ibarət menyu tələbi qoymaq mümkündür. Köməkçi endirim və kampaniyaları da göstərir, daha ucuz alternativlər təklif edir. Beləliklə, həftəlik uşaq naharları kimi büdcəyə uyğun menyular hazırlamaq olar.

    Köməkçi əvvəlki sifarişlərə baxaraq tez-tez alınan məhsulları və mətbəx üçün lazım olan ərzaqları yenidən səbətə əlavə edir. Əl ilə yazılmış ərzaq siyahısının fotosunu və ya rəqəmsal siyahının ekran görüntüsünü də yükləmək olar. “Clementine” şəkildəki məhsulları tanıyaraq onlar üçün hazır səbət yaradır. “Instacart”ın məlumatına görə, bu köməkçi ilə verilən sifarişlər adətən 115 dolları (təxminən 200 manat) keçir.

    “Clementine” “Instacart”ın öz söhbət köməkçisidir. Bununla yanaşı, şirkətin sistemi başqa süni intellekt xidmətləri ilə də işləyir. Son aylarda “Instacart” “ChatGPT”, “Claude”, “Gemini” və “Google Search”dəki “AI Mode” ilə əməkdaşlıq edərək həmin xidmətlər üzərindən ərzaq sifarişini mümkün edib. “Uber Eats” və “DoorDash” da gündəlik dildə yazılan istəkləri istifadəçiyə uyğun ərzaq səbətinə çevirən oxşar köməkçilər təqdim edib. Bu funksiyalar yemək və alış planını çatdırılma tətbiqindən çıxmadan hazırlamağa imkan verir.