Intel məlumat mərkəzləri üçün 480 GB yaddaşlı AI prosessoru təqdim etdi

    “Intel” “Open Compute Project Global Summit” tədbirində süni intellekt (AI) tapşırıqları üçün hazırladığı “Intel GPU D-series” sürətləndiricisini göstərib. Yeni qrafik prosessor 480 GB LPDDR5X yaddaşla təchiz olunub. O, əsasən hazır AI modellərinin sorğulara cavab verməsi üçün hazırlanıb. Bu, məlumat mərkəzləri üçün GPU-lar arasında rekord yaddaş tutumu sayılır. Müqayisə üçün, “Nvidia Blackwell Ultra B300” modelində 288 GB HBM3e yaddaş var.

    “Intel” müasir videokartlarda işlənən GDDR7 əvəzinə daha az enerji sərf edən LPDDR5X yaddaşı seçib. Sürətləndirici tək kartda 300 milyarda qədər parametrdən ibarət böyük dil modelini işlədə bilir. 8 GPU-lu sistemdə 1 trilyondan çox parametrli modelləri işə salmaq olur. Belə sistemlər uzun sorğuların cavablandırılması, eyni anda çoxsaylı müraciətin emalı, şirkətlərin AI xidmətləri və robot texnikası üçündür.

    Şirkətin məlumatına görə, yeni prosessor FP8 hesablamalarında 1,3 petaflops gücə çatır. FP8 AI əməliyyatlarını sürətləndirən və yaddaş sərfini azaldan rəqəm formatıdır. Yaddaşın məlumat ötürmə sürəti 1,5 TB/s-dir. Ancaq sorğuların nə qədər tez emal olunması yalnız yaddaş tutumundan asılı deyil. Burada hesablama gücü, proqram təminatı və tapşırığın növü də rol oynayır.

    Yeni sürətləndirici 350 Vt enerji sərf edir və standart PCIe kart ölçüsündədir. Hava ilə soyudulduğuna görə onu məlumat mərkəzlərində xüsusi avadanlıq olmadan quraşdırmaq daha asan olmalıdır. “Intel” öz GPU platformaları arasında proqram uyğunluğu da vəd edir. Sürətləndirici “Xeon” prosessorları ilə birlikdə işləyəcək, tapşırıqların və məlumat axınının idarəsi isə mərkəzi prosessora həvalə olunacaq.

    “Intel GPU D-series” adi oyun videokartı deyil. O, müəssisələrin böyük dil modellərini məlumat mərkəzlərində işlətməsi üçün hazırlanıb. “Intel” yüksək yaddaş tutumu və nisbətən sadə quraşdırma ilə AI modellərinin sorğuları cavablandırması prosesini daha əlçatan və sistemlərin böyüdülməsini daha sərfəli etməyi planlaşdırır. “Intel GPU D-series” modelinin qiyməti və satış tarixi hələ açıqlanmayıb.