İşdən azad edilmiş Candy Crush tərtibatçıları süni zəka ilə əvəz ediləcək

     Mobilegamer.biz nəşri bir neçə mənbəyə istinad edərək mobil oyun sahəsində Candy Crush ilə tanınan King şirkətində baş vermiş son ixtisarlarla bağlı ətraflı məlumat paylaşıb. Qeyd edək ki, King-dəki ixtisarlar Barselona ofisində təxminən 200 əməkdaşı əhatə edib və bu, iyulun əvvəlində Xbox daxilində baş vermiş genişmiqyaslı (təxminən 4000 nəfər) ixtisar dalğasının bir hissəsi olub. Mobilegamer.biz-in məlumatına görə, King-dəki ixtisarlar əsasən orta səviyyəli menecerlərə, səviyyə dizaynerlərinə, istifadəçi təcrübəsi üzrə mütəxəssislərə, istifadəçi araşdırmaları şöbəsinin əməkdaşlarına və kopirayter komandasına təsir edəcək.

     Mobilegamer.biz mənbələrinin bildirdiklərinə görə, son illərdə işdən çıxarılmış əməkdaşların bir çoxu iş prosesini sürətləndirən süni zəka alətlərinin yaradılması və inkişafı ilə məşğul olub: “İndi isə həmin süni zəka alətləri komandaların yerini tutur”. Mənbələrdən biri Mobilegamer.biz-ə bildirib: “Süni zəka alətlərinin insanları əvəz etməsi sadəcə iyrəncdir. Hər şey effektivlik və gəlir naminə edilir, halbuki şirkətin vəziyyəti əladır”. Həmin mənbənin bildirdiyinə görə, King şirkətində işdən çıxarılan bəzi əməkdaşlar, şirkətin addımlarına və ya daxili proseslərinə açıq narazılıq bildirdiklərinə görə insan resursları şöbəsinin hədəfinə çevriliblər. Son sorğulara əsasən, King-dəki əməkdaşların əhval-ruhiyyəsi artıq ixtisarlardan əvvəl də problemlidir. Şirkət rəhbərliyi komanda ruhunu yüksəltməyi əsas prioritetlərindən biri kimi təqdim edirdi: “Təsəvvür etmək olar ki, indi o, tam dibdədir”.