Jack Dorsey Block-da 4 min işçini ixtisar etdi

    Technote.az “TechCrunch” platformasına istinadən bildirir ki, Jack Dorsey rəhbərlik etdiyi Block şirkətində kəskin ixtisar qərarı verib. Şirkət 4.000-dən çox əməkdaşı işdən azad edərək ümumi heyəti 10 mindən 6 minə qədər azaldır. Qərarın açıqlanmasından sonra investorların reaksiyası müsbət olub və şirkətin səhmləri birjada 24 %-dən çox bahalaşıb. Block ödəniş texnologiyaları sahəsində fəaliyyət göstərir və onun portfelinə Square, Cash App və Tidal daxildir.

    Bu, texnologiya sektorunda ilk belə addım deyil. 2022-ci ilin noyabrında Elon Musk Twitter (indiki X) platformasını satın aldıqdan sonra işçilərin təxminən 50 %-ni işdən çıxarmışdı. Həmin qərar Silikon Vadisində böyük rezonans doğurmuş və CEO-ların sərt restrukturizasiya addımlarına dair “qeyri-rəsmi qaydaları” dəyişmişdi. Maraqlıdır ki, Dorsey həmin dövrdə Twitter-də 2,4 %-lik payını Musk-ın satınalmasına daxil etmiş və X-in ən böyük xarici investorlarından birinə çevrilmişdi. Onların münasibətləri zaman-zaman dəyişkən olub. Dorsey əvvəl Musk-ın Twitter alışını dəstəkləmiş, sonra isə “bu sövdələşmədən geri çəkilməli idi” demişdi. O, eyni zamanda alternativ sosial şəbəkə olan Bluesky layihəsinin yaradıcılarından biri olsa da, sonradan idarə heyətindən ayrılıb.

    Dorsey ixtisar qərarını maliyyə böhranı ilə deyil, strateji seçimlə əlaqələndirib. O bildirib ki, “təkrar-təkrar edilən ixtisar dalğaları komanda ruhunu və şirkətə olan etimadı zədələyir”. Onun sözlərinə görə, bu addım gələcəkdə qaçılmaz olacaq dəyişikliklərə proaktiv yanaşmadır və bir il ərzində bir çox şirkət eyni nöqtəyə gələcək. Block-un maliyyə direktoru Amrita Ahuja isə ixtisarların əsas səbəbi kimi süni intellektdən istifadənin artmasını göstərib. Onun fikrincə, daha kiçik, lakin yüksək ixtisaslı komandalar AI vasitəsilə daha sürətli və effektiv işləyə biləcək.

        Son illərdə Salesforce və Amazon kimi nəhənglər də süni intellektin səmərəliliyi artırması arqumenti ilə minlərlə əməkdaşı ixtisar edib. Lakin bəzi analitiklər bu qərarların arxasında real AI məhsuldarlığından çox, maliyyə optimallaşdırmasının dayandığını bildirirlər. Texnologiya sektorunda görünən odur ki, yeni mərhələ başlayır: daha az insan resursu, daha çox avtomatlaşdırma və daha aqressiv idarəetmə qərarları.