Kevin Weil dərman sınaqları üçün Warp Sciences adlı AI startapı yaradıb

    “OpenAI”-ın keçmiş elm rəhbəri Kevin Weil dərmanların hazırlanmasında laboratoriya işlərini avtomatlaşdırmaq üçün “Warp Sciences” adlı süni intellekt startapı yaradıb. Şirkət tədqiqatçıların seçdiyi perspektivli kimyəvi birləşmələri hazırlamaq və sınaqdan keçirmək üçün robotlardan yararlanacaq. Weil startapın yaradıldığını və ilk sərmayə turunu “X” platformasında açıqlayıb.

    “Warp Sciences” 215 milyon dollar (təxminən 366 milyon manat) sərmayə cəlb edib. Bu sərmayədən sonra şirkətin dəyəri 865 milyon dollara (təxminən 1 milyard 471 milyon manata) çatıb. Sərmayə turuna “Lightspeed” rəhbərlik edib. “IVP”, “Premji Invest” və “Lux Capital” da maliyyələşməyə qoşulub.

    Biotexnologiya şirkətləri minlərlə molekul variantının hazırlanması kimi çox vaxt və əmək tələb edən işləri uzun müddətdir Çindəki podratçılara tapşırır. Onların arasında “WuXi AppTec” də var. Kevin Weil bu işləri “Warp Sciences” ilə yenidən ABŞ-yə qaytarmaq istəyir. Məqsəd dərmanların hazırlanması prosesini geosiyasi problemlərdən və təchizat risklərindən qorumaqdır.

    Startapın kimyaçıları kameralar və sensorlu əlcəklərlə işləyərək müxtəlif laboratoriya tapşırıqlarını robotlara öyrədəcəklər. Söhbət maddələrin real laboratoriya şəraitində hazırlanması və sınaqdan keçirilməsindən gedir. “Warp Sciences” gecə-gündüz işləyə bilən robotlarla təcrübələri sürətləndirməyi və yeni dərman namizədlərini daha tez yoxlamağı planlaşdırır.