Meta ABŞ-də süni intellektlə işləyən alış-veriş köməkçisini test edir

    Technote.az “Engadget” platformasına istinadən bildirir ki, Meta ABŞ-də bəzi istifadəçilər üçün yeni süni intellekt əsaslı alış-veriş alətini test etməyə başlayıb. Bloomberg-in yaydığı məlumata görə, funksiya hazırda yalnız masaüstü brauzer vasitəsilə Meta AI veb versiyasında seçilmiş istifadəçilərə göstərilir. İstifadəçilər bu imkana malik olduqlarını sorğu qutusunda “Shopping research” düyməsini gördükdə anlayırlar. Şirkət test prosesini təsdiqləsə də, funksiyanın nə vaxt geniş istifadəyə veriləcəyi barədə açıqlama verməyib.

    Yeni alət istifadəçinin məhsul tövsiyəsi istəyi əsasında şəkillər, qiymətlər və brend məlumatları ilə birlikdə məhsul karuseli təqdim edir. Hər məhsul üçün ayrıca onlayn mağazaya keçid linki və qısa tövsiyə izahı da göstərilir. Meta AI istifadəçinin cinsi və yerləşmə məlumatı kimi profil məlumatlarına çıxışı olduğu halda, nəticələri daha fərdi şəkildə təqdim edə bilir. Məsələn, sistem Nyu-Yorka çatdırılma edən mağazalardan qadınlar üçün şişmə gödəkçələr təklif edib. Alış prosesi birbaşa Meta AI platformasında tamamlanmır, lakin istifadəçilər təqdim olunan linklər vasitəsilə alış edə bilirlər.

    Şirkətin baş icraçı direktoru Mark Zuckerberg bu ilin əvvəlində investorlarla görüş zamanı agent əsaslı alış-veriş alətlərinin istifadəyə veriləcəyini bildirmişdi. Meta-nın bu istiqamətdə addım atması təəccüblü deyil, çünki rəqib şirkətlər artıq oxşar imkanlar təqdim edirlər. OpenAI ötən il “Black Friday” öncəsi ChatGPT üçün xüsusi alış-veriş köməkçisini istifadəyə vermişdi. Bundan qısa müddət sonra Google da Gemini platformasında alış-veriş alətlərini təqdim edib. Həmçinin Perplexity AI da oxşar süni intellekt əsaslı alış-veriş köməkçisini istifadəyə buraxıb.