Meta ev işləri üçün süni intellektli insanabənzər robot hazırlayır

    “Meta” süni intellekti fiziki işlər görə bilən robotlarda işlətmək üçün insanabənzər robot layihəsini genişləndirir. Şirkət Çinin “Fourier” robototexnika firması ilə “Max” adlı ilk prototipi təxminən 3 aya hazırlayıb və artıq 2-ci nəsil üzərində işləyir. Layihə hələ araşdırma mərhələsindədir. Əsas məqsəd gələcəkdə evdə gündəlik işləri görə bilən robot yaratmaqdır.

    “Max”ın çəkisi təxminən 48 kq, hündürlüyü isə 1,5 metrdir. Robot “Nvidia” şirkətinin “Jetson Thor” çipi ilə işləyir. Üz ifadələrini təqlid edən ekranı, daxili dinamikləri və 5 barmaqlı əlləri var. Hazırkı prototip butulka və oyuncaq kimi kiçik əşyaları götürə bilir.

    Komanda “Fourier” ilə birlikdə işləmək üçün Şanxaya gedib. “Meta”nın robototexnika məhsulları üzrə vitse-prezidenti Li-Chen Miller təxminən 2 ay fabrikin daxilində çalışıb. Prototip avqustda keçirilən daxili robototexnika toplantısında şirkətin bəzi əməkdaşlarına göstərilib. “Max 2” versiyasının hazırlanmasına sentyabrda başlanıb.

    “Max 2” üçün gövdə yenidən qurulacaq, əşyaları daha yaxşı tuta bilən əllər hazırlanacaq. Yeni versiyada proyektor və əlavə sensorların da olması gözlənilir. Bu sensorlar pilləkənlərlə hərəkət zamanı robota ətrafı daha düzgün tanımağa kömək edəcək. Məqsəd ətrafındakı əşyalarla daha təbii işləyə bilən robot yaratmaqdır.

    “Meta” robotu “Muse” adlı süni intellekt sistemi ilə birləşdirmək istəyir. Şirkətin planına görə, “Muse” gələcəkdə məişət işlərini görə bilən fiziki köməkçiyə çevrilə bilər. “Meta” mayda robotlar üçün süni intellekt proqramları hazırlayan “Assured Robot Intelligence” startapını alıb. “Nvidia” da şirkətə 3 milyard dollar (təxminən 5,1 milyard manat) sərmayə yatırmağa və “Muse” üzərində əməkdaşlığı genişləndirməyə razılaşıb.

    Hazırda “Max” kiçik əşyaları götürə bilsə də, evdə etibarlı işləyən köməkçi olmaqdan hələ xeyli uzaqdır. “Meta” və “Fourier” bu layihəni daxili araşdırma və sınaq üçün aparır. Şirkət prototipləri satmağı planlaşdırmır. Kommersiya məhsulunun nə vaxt çıxacağı da açıqlanmayıb.