Meta məşhur AI startapı Manus-u $ 2 milyarda satın aldı

    Technote.az “TechCrunch” platformasına istinadən bildirir ki, Meta Platforms süni intellekt sahəsində növbəti böyük addımını atıb. Şirkət Sinqapurda yerləşən və son aylarda Silikon Vadisində böyük maraq doğuran Manus adlı AI startapını satın alır. Bu ilin yazında ortaya çıxan Manus yayımladığı qısa demo video ilə sürətlə məşhurlaşmışdı. Videoda süni intellekt agentinin işə namizədləri seçə bilməsi, səyahət planları qurması və investisiya portfellərini analiz etməsi göstərilirdi. Şirkət həmin vaxt Manus-un OpenAI-ın Deep Research alətindən daha yaxşı nəticələr verdiyini iddia etmişdi.

    Aprel ayında, fəaliyyətə başlamasından cəmi bir neçə həftə sonra, Manus $ 75 milyonluq investisiya raundu bağlayaraq $ 500 milyon dəyərində qiymətləndirilmişdi. Raunda Benchmark rəhbərlik edib, fondun tərəfdaşı Chetan Puttagunta isə şirkətin idarə heyətinə qoşulub. Daha əvvəl Tencent, ZhenFund və HSG (keçmiş Sequoia China) da startapa sərmayə yatırmışdı. Manus-un aylıq $ 39 və $ 199-lıq abunə modelləri bəzi suallar doğursa da, Bloomberg bu qiymətləri erkən mərhələdə olan məhsul üçün “aqressiv” adlandırmışdı. Buna baxmayaraq, şirkət sonradan milyonlarla istifadəçiyə çatdığını və illik təkrarlanan gəlirinin $ 100 milyonu keçdiyini açıqladı.

    Məhz bundan sonra Meta danışıqlara başlayıb. The Wall Street Journal-ın məlumatına görə, Meta Manus-u $ 2 milyard qarşılığında alır. Bu, startapın növbəti investisiya mərhələsində tələb etdiyi qiymətləndirmə ilə eynidir. Meta bildirib ki, Manus müstəqil şəkildə fəaliyyətini davam etdirəcək, lakin onun AI agentləri Facebook, Instagram və WhatsApp platformalarına inteqrasiya olunacaq. Hazırda bu platformalarda Meta AI adlı çatbot artıq aktivdir.