Meta Muse süni intellekt agentini çıxardı: alış-veriş də edə bilir

    “Meta” istifadəçilər üçün “Muse” adlı ilk süni intellekt agentini çıxarıb. İstifadəçinin adından tapşırıqlar görən proqram internetdə axtarış apara, alış-veriş edə, formaları doldura, səfər planlaşdıra və e-poçt göndərə bilir. “Muse” tədbirləri təqvimə əlavə edir, bir neçə mərhələdən ibarət işlər üçün öz proqram alətlərini də yaradır. Şirkətin məlumatına görə, agentdən istifadə etmək üçün texniki bilik lazım deyil.

    “Muse” ayrıca xidmətdir və “Meta AI” tətbiqinə daxil deyil. Agentin “iOS” və “Android” tətbiqləri, həmçinin veb versiyası var. Qeydiyyat üçün “Facebook” və ya “Instagram” hesabı lazım deyil, amma “Meta” hesabı olmalıdır. İlk girişdən sonra agentə ad vermək, avatarını dəyişmək və söhbətlərin süni intellekt modellərinin öyrədilməsində işlədilməsini söndürmək olur.

    İcazələr bölməsində agentin hansı addımlar üçün təsdiq istəyəcəyi seçilir. Standart ayarlarda yalnız internetə və başqa xidmətlərə çıxış tələb edən bəzi əməliyyatlar təsdiqlənməlidir. “Meta”ya görə, risk az olduqda agent sərbəst işləyə bilər. Ancaq “Muse” səhv edə bildiyi üçün başlanğıcda hər əməliyyata ayrıca təsdiq istəyən ayarı seçmək daha təhlükəsizdir.

    Bağlantılar bölməsindən agenti “Google”, “Spotify” və “OpenTable” kimi xidmətlərə qoşmaq olur. Əsas poçt qutusunu qorumaq istəyənlər “Muse” üçün ayrıca “Gmail” hesabı aça bilərlər. “Meta” deyir ki, açıq API-si olan xidmətlərə də qoşulmaq olar. API proqramların bir-biri ilə məlumat mübadiləsi aparmasına kömək edən bağlantıdır. Məsələn, “Muse” “Notion” hesabına bağlantının əl ilə necə qurulacağını izah edə bilir.

    “Muse” istifadəçinin adından alış-veriş də edə bilər. Bunun üçün pul kisəsi bölməsinə bank kartı əlavə edilməlidir. Ödəniş sistemi “Stripe” üzərindən işləyir və agent kartın tam nömrəsini görmür. Sifariş tamamlanmazdan əvvəl istifadəçidən təsdiq istənməlidir. Bununla belə, “Meta” agentin gözlənilməz əməliyyat apara biləcəyi barədə xəbərdarlıq edir və onu diqqətlə izləməyi məsləhət görür.

    “Muse” “Facebook” və “Instagram”da saxlanmış paylaşımları da nizamlaya bilir. Məsələn, reseptləri ərzaqlara və hazırlanma mərhələlərinə görə qruplaşdırır, orijinal paylaşımların keçidlərini əlavə edir. Restoran qeydlərini şəhərlər üzrə sıralamaq da olur. Səfər planlaşdırarkən birbaşa uçuşları tapır, qiymətləri izləyir və şəhərlərə hansı ardıcıllıqla getməyi göstərir. İstifadə artdıqca maraqları öyrənir və ideyalar bölməsində daha uyğun tapşırıqlar göstərir.

    Agent sadə sorğunu belə yanlış və ya gözlənilməz formada başa düşə bilər. “Meta” bir neçə təhlükəsizlik tədbiri gördüyünü desə də, sifarişləri, məktubları və təqvimə əlavə olunan məlumatları yoxlamaq vacibdir. “Muse” istifadəçinin adından işləyərkən onun addımlarını izləmək, ilk vaxtlarda isə daha məhdud icazələr seçmək daha təhlükəsizdir.