Meta-nın Muse AI köməkçisi şəxsi məlumatları yad istifadəçilərə göstərib
Süni İntellekt
19.11.2026
“Meta” əməkdaşları deyirlər ki, şirkətin “Muse” adlı süni intellekt köməkçisi müxtəlif hesablardakı söhbətləri qarışdırıb və şəxsi məlumatları yad istifadəçilərə göstərib. Daxili müzakirələrdə uşaq baxımı, karyera məsləhətləri, məhsul sifarişləri və bank hesablarındakı pul barədə səhv bildirişlərdən danışılıb. Əməkdaşların sözlərinə görə, həmin məlumatların onların sorğuları və hesabları ilə əlaqəsi olmayıb.
Hadisələrdən birində “Muse” hava və dəniz səviyyəsinin qalxıb-enməsi barədə söhbətə gözlənilmədən 2 bank hesabının məlumatını əlavə edib. Mesajda “Capital One” hesabının balansı 2722,58 dollar (təxminən 4630 manat) göstərilib. “Charles Schwab” hesabında isə 5899,57 dollar (təxminən 10030 manat) olduğu yazılıb. Bildirişi alan əməkdaş bank hesabını tətbiqlə paylaşmadığını və bank mövzusunda danışmadığını deyib. O, məlumatların başqa istifadəçiyə aid ola biləcəyindən narahat olub.
Başqa bir əməkdaş şəxsi telefonunda “Muse”dan bacısının “Signal” mesajına cavab verməsi üçün xatırlatma alıb. Halbuki o, tətbiqə digər proqramlara giriş icazəsi vermədiyini deyib. Problemin ekranda görünən bildirişlərin məzmununun oxunması ilə bağlı ola biləcəyi düşünülür. Ancaq “AI Now Institute” icazəsiz girişi yenidən yarada bilib. Daha əvvəl “Mac” tətbiqinin də istifadəçi icazə verməsə belə mesajları oxuduğu aşkarlanmışdı. “Muse” əvvəlcə bunu bildirişlərlə əlaqələndirsə də, sonradan bu izahın doğru olmadığı üzə çıxıb. “Meta” hadisəni xəta adlandırıb.
“Muse” sentyabrda əvvəlcə “iPhone” üçün çıxıb, daha sonra “Mac” və “iPad” versiyaları yayımlanıb. “Meta” tətbiqi gündəlik işləri görə bilən şəxsi süni intellekt köməkçisi kimi tanıdıb. Güclü reklam kampaniyasından sonra tətbiq ABŞ bazarında “App Store” siyahısında liderliyə yüksəlib və “ChatGPT” tətbiqini geridə qoyub. “Muse” 10 milyondan çox yüklənib və hazırda pulsuz “iPhone” tətbiqləri arasında 2-ci yerdədir.
“Meta” bunları ayrı-ayrı hallar kimi qiymətləndirib. Şirkətə görə, bank hesablarındakı məbləğlər real məlumat sızması yox, süni intellektin uydurduğu rəqəmlər ola bilər. Bununla belə, bir təhlükəsizlik tədqiqatçısı daha əvvəl “Muse”da diktə edilən sorğuları ələ keçirib başqa serverə yönəldə bilən naməlum boşluq aşkarlamışdı. Şirkət yeni iddialarla bağlı əlavə açıqlama verməyib.
Şərhlər
Şərh yazmaq üçün Google və ya Facebook hesabınızla daxil olun.
Şərhlər yüklənir...
Ən çox oxunanlar