Microsoft Copilot 15 yanvardan etibarən WhatsApp-dan çıxarılır

    Technote.az "TechCrunch" platformasına istinadən bildirir ki, Microsoft təsdiqləyib ki, şirkətin süni intellekt çatbotu Copilot 15 yanvardan sonra artıq WhatsApp-da istifadə edilə bilməyəcək. Bu tarixdən etibarən WhatsApp üzərindən Copilot ilə danışmaq mümkün olmayacaq. İstifadəçilər yalnız Microsoft-un mobil Copilot tətbiqlərinə və ya veb versiyasına keçməklə xidmətə davam edə biləcəklər.

    Şirkət bu addımı WhatsApp-ın ötən ay açıqladığı yenilənmiş platforma qaydalarına uyğunlaşmaq üçün atdığını bildirib. Meta-ya məxsus messencer daha əvvəl elan etmişdi ki, WhatsApp Business API artıq ümumi məqsədli süni intellekt çatbotlarının istifadəsinə açıq olmayacaq. Bununla da Microsoft, OpenAI, Perplexity və digər şirkətlər bu dəyişiklikdən təsirlənəcək. OpenAI artıq WhatsApp inteqrasiyasını yanvar ayında tam dayandıracağını açıqlamışdı.

    Copilot istifadəçiləri üçün başqa bir məhdudiyyət isə ondan ibarətdir ki, WhatsApp üzərindən aparılan keçmiş söhbətlər Microsoft platformasına köçürülə bilməyəcək. Çünki Copilot WhatsApp-da autentifikasiya edilməmiş şəkildə işləyirdi. Microsoft məsləhət görür ki, söhbət tarixçəsini saxlamaq istəyən istifadəçilər 15 yanvaradək WhatsApp-ın daxili “export” funksiyasından istifadə edərək məlumatlarını çıxarsınlar.