Microsoft rəhbərindən şirkətlərə AI xəbərdarlığı

    Microsoft-un baş direktoru Satya Nadella şirkətlərə süni intellekt strategiyaları ilə bağlı diqqətçəkən xəbərdarlıq edib. Onun fikrincə, bütün süni intellekt ehtiyaclarını yalnız bir AI şirkətinə və ya modelinə həvalə edən bizneslər gələcəkdə müstəqilliklərini itirə, hətta rəqabətdə ayaqda qala bilməyə bilərlər. CNN-in “Fareed Zakaria GPS” proqramında danışan Nadella bildirib ki, şirkətlər süni intellekt modellərinə ötürdükləri məlumatlara, promptlara və istifadə zamanı yaranan metadataya özləri nəzarət etməlidirlər. Onun sözlərinə görə, bu məlumatların şirkətin özündə saxlanılması gələcəkdə həmin məlumatlardan öz modelini hazırlamaq və ya açıq modelləri öyrətmək üçün istifadə etməyə imkan verə bilər.

    Nadella bunu olduqca sərt ifadə edib: şirkət bu nəzarətə sahib deyilsə, faktiki olaraq “öz düşüncəsini kənara həvalə etmiş” olur. Onun fikrincə, belə yanaşma uzunmüddətli perspektivdə biznesin müstəqilliyi üçün təhlükə yaradır. Microsoft rəhbəri şirkətlərin yalnız bir AI modelinə bağlı sistemlər qurmaq əvəzinə, müxtəlif modellər arasında keçid edə biləcəkləri infrastruktur yaratmasını tövsiyə edir. Bunun üçün model ilə şirkətin məlumatları arasında ayrıca AI gateway və idarəetmə qatlarından istifadə oluna bilər. Beləliklə, məsələn, bir model daha yaxşı kod yazdığı, digəri isə məlumatları daha yaxşı analiz etdiyi üçün şirkət hər tapşırıqda uyğun modeli seçə bilər. Hətta istifadə olunan modellərdən biri fəaliyyətini dayandırsa və ya şərtlərini dəyişsə belə, şirkətin bütün AI infrastrukturu bundan asılı qalmaz.