Microsoft rəqibinin üstünlüyünü açıq şəkildə qəbul edib

    Technote.az “TechRadar” platformasına istinadən bildirir ki,  Microsoft-un Süni İntellekt üzrə rəhbəri Mustafa Süleyman nadir hallarda rast gəlinən bir etirafla çıxış edib. O, Google-un yeni süni intellekt modeli Gemini 3-ün bəzi imkanlar baxımından Microsoft Copilot-dan üstün olduğunu açıq şəkildə qəbul edib.

    Süleyman Bloomberg-ə verdiyi müsahibədə bildirib ki, “Gemini 3 Copilot-un edə bilmədiyi bəzi işləri görə bilir”. Bununla belə, o, Copilot-un da Gemini-də olmayan funksiyalara sahib olduğunu vurğulayıb. Google tərəfindən indiyədək təqdim olunan ən güclü multimodal model kimi təqdim edilən Gemini 3 xüsusilə məlumatları anlama, birləşdirmə və yaradıcı nəticələr çıxarma sahəsində ön plana çıxır. Süleyman isə Copilot-un əsas üstünlüyünün gündəlik istifadə üçün daha uyğun və praktik olmasında olduğunu deyib.

    Onun sözlərinə görə, Copilot-un ən güclü tərəflərindən biri vizual imkanlarıdır. İstifadəçilər Copilot ilə ekranlarını paylaşa, real vaxtda gördükləri haqqında danışa və dərhal rəy ala bilirlər. Bu funksiya həm mobil, həm də masaüstü cihazlarda aktiv şəkildə işləyir. Microsoft hazırda Copilot-u Windows 11, Outlook, Excel və Microsoft Edge daxil olmaqla demək olar ki, bütün məhsullarına inteqrasiya edir.

    Nəticə etibarilə, Google Gemini 3 daha çox “ən ağıllı model” olmağa fokuslanarkən, Microsoft Copilot gündəlik həyat üçün etibarlı və praktik rəqəmsal köməkçi rolunu oynamağı hədəfləyir. Bu yanaşma fərqləri isə istifadəçilərə ehtiyaclarına uyğun süni intellekt seçimi imkanı yaradır.