Microsoft yeni data mərkəzləri qurur

    Technote.az “TechCrunch” platformasına istinadən bildirir ki, Microsoft süni intellekt infrastrukturu üçün yeni məlumat mərkəzləri (data center) inşa edəcəyini açıqlayıb. Şirkət bu layihələrin yerli icmalar üçün əlavə maliyyə yükü yaratmayacağını, xüsusilə də elektrik enerjisi tariflərinin əhali üçün bahalaşmasına yol verilməyəcəyini bildirib.

    Şirkətin verdiyi açıqlamaya görə, Microsoft “icma mərkəzli” yanaşma tətbiq edəcək və məlumat mərkəzlərinin elektrik şəbəkəsinə düşən yükünü tam şəkildə özü ödəyəcək. Bu məqsədlə yerli elektrik təchizatçıları və tarifləri təsdiqləyən dövlət qurumları ilə birbaşa əməkdaşlıq ediləcək. “Bizim məqsədimiz sadədir: məlumat mərkəzlərimizin elektrik xərcləri yerli sakinlərin hesabına düşməsin,” – deyə Microsoft bəyan edib. Bu açıqlama Meta şirkətinin də öz AI infrastrukturu təşəbbüsünü elan etməsindən cəmi bir gün sonra gəlib. Son illər texnologiya nəhəngləri süni intellekt üçün milyardlarla dollarlıq infrastruktur sərmayələrini sürətlə artırır.

    Microsoft eyni zamanda məlumat mərkəzlərinin su istehlakını minimuma endirəcəyini, eləcə də yerləşdiyi regionlarda yeni iş yerləri yaradacağını vəd edir. Xüsusilə su ehtiyatlarına təsir məsələsi son dövrlərdə data center layihələri ətrafında ən çox tənqid olunan mövzulardan biridir.