Minecraft-da CraftGPT adlı işlək kiçik süni intellekt modeli hazırlanıb (VİDEO)

     Minecraft oyunu yalnız sizin təxəyyülünüz və yaradıcılıq qabiliyyətlərinizlə məhdudlaşan bir sandbox-dur (qum qutusu) və bu, sammyuri ləqəbli yutuberin videosunda tam şəkildə nümayiş olunur. Oyunçu orijinal Minecraft versiyasındakı redstone materialının mexanikasından istifadə edərək, oyunun içində işləyən funksional kiçik süni intellekt modeli yarada bilib. Əgər əvvəllər Minecraft-da ekstremal mühəndislik nümunələrinə baxmısınızsa, yəqin ki, sammyuri-nin işləri ilə tanışsınız. Onun son layihəsi CraftGPT adlanır və 1020 x 260 x 1656 blokdan (439 milyon) ibarət həcm tutur.

     O, o qədər böyükdür ki, onu videoda nümayiş etdirmək üçün District Horizons moduna ehtiyac duyulub. Kiçik dil modeli 5 087 280 parametrə malikdir və Python üzərində TinyChat məlumat toplusu ilə öyrədilib. Videoya şərh yazan bəzi istifadəçilərin məlumatına görə, CraftGPT dil modeli GPT-1-dən təxminən 23 dəfə, GPT-3-dən isə təxminən 175 000 dəfə kiçikdir. Texniki xüsusiyyətlərin açıqlanmasına baxmayaq, sammyuri CraftGPT-dən gözləntiləri yumşaltmağı tövsiyə edir: model tez-tez mövzudan kənara çıxa, qrammatik cəhətdən səhv cavablar verə və ya sadəcə sorğuya uyğun olmayan cavablar təqdim edə bilər. Bundan əlavə, CraftGPT çox yavaş bir modeldir.

     Minecraft Redstone yüksək performanslı serverindən istifadə edilərək tick rate 40 000 dəfə artırılsa da, CraftGPT bir cavabı təxminən 2 saata yarada bilir. Tick rate artırılmadan cavab gözləmək üçün 10 ildən çox vaxt lazım olardı. CraftGPT-ni sınaqdan keçirmək istəyənlər bütün lazımi faylları GitHub-dan yükləyə bilərlər. Sammyuri ən azı 32 GB RAM-lı, ideal halda isə 64 GB RAM-lı kompüterdən istifadəni tövsiyə edir. GitHub-da həmçinin quraşdırma təlimatları və kiçik dil modelindən maksimum səmərə ilə istifadə üçün bir neçə faydalı məsləhət mövcuddur.