Mirror Particle insan davranışını proqnozlaşdıran süni intellekt qurur

    “Mirror Particle” insanların gələcək davranışını və qərarlarının səbəblərini proqnozlaşdıran süni intellekt modeli hazırlayır. San Fransiskoda yerləşən 2 illik startap sistemi sıfırdan qurulmuş “dünya modeli” adlandırır. Model insanların yaşadığı mühiti və bu mühitə reaksiyalarını birlikdə öyrənir. Şirkətə görə, sistem istehlakçı davranışının zamanla necə dəyişdiyini də izləyəcək.

    Son 1 ildə bu sahəyə maraq sürətlə artıb. “Simile” 2 milyard dollar (təxminən 3,4 milyard manat) dəyərində qiymətləndirilib və 200 milyon dollar (təxminən 340 milyon manat) yatırım alıb. “Aaru” 1 milyard dollar (təxminən 1,7 milyard manat) qiymətləndirmə ilə 88 milyon dollar (təxminən 149,6 milyon manat) cəlb edib. “Humans&” 2026-cı ilin yanvarında 480 milyon dollarlıq (təxminən 816 milyon manat) ilk yatırım mərhələsini açıqlayıb. Həmin vaxt şirkətin dəyəri 4,48 milyard dollar (təxminən 7,62 milyard manat) hesablanıb və “Persimmon” adlı sistemi çıxıb.

    “Mirror Particle” öz yanaşmasının böyük dil modelləri ilə hədəf auditoriyanın virtual surətini yaradan sistemlərdən fərqləndiyini deyir. Şirkətin fikrincə, əsasən yazılı mətnlə öyrədilən modellər insanların gördüklərini necə qavradığını, məkan düşüncəsini və sosial davranışını tam əks etdirmir. Az miqdarda yeni məlumatla əlavə təlim keçmək də köhnə məlumatlardan yaranan meylləri kifayət qədər dəyişmir.

    Model müştəri məlumatlarını gündəlik hadisələr, pop mədəniyyət və sosial şəbəkələrdən toplanan məlumatlarla birləşdirir. Burada əsas diqqət insanların sorğularda nə dediyinə deyil, əslində necə davrandığına yönəlir. Sistem insanların fikrinin hansı təcrübələrdən sonra və nəyin təsiri ilə dəyişdiyini izləyir. Heç bir dəyişiklik olmadıqda bunu da ayrıca göstərici kimi qeyd edir.

    İlk mərhələdə texnologiya bazar araşdırmaları, brend və məhsul strategiyası üçün işlədiləcək. Məsələn, sistem kosmetika brendinə yalnız Z nəslinə uyğun reklam mətni yazmaqda kömək etmir. O, həmin auditoriyanın məhsulu həqiqətən istəyib-istəmədiyini də müəyyənləşdirə bilər. Proqnoz sistemi tövsiyə ilə kifayətlənmir, insanların seçiminə təsir edən istək, maneə və digər səbəbləri də müştəriyə göstərir.

    İlk sınaqlardan birində tanınmış heyvan yemi brendi satışları artırmaq üçün qablaşdırmada hansı təsviri seçməli olduğunu öyrənmək istəyib. Model problemin toyuq, mal əti və ya tərəvəz təsvirində olmadığını müəyyən edib. Brend çox tanındığı üçün alıcılar onu kütləvi və ucuz məhsul kimi qəbul edirmiş. Buna görə satış artımına qablaşdırma deyil, məhsul haqqında yaranmış bu fikir mane olurmuş.

    Startap fərdi investorlardan ilkin maliyyə alıb və ilk vençur yatırım mərhələsini bağlamağa yaxınlaşdığını açıqlayıb. “Mirror Particle” 13-15 oktyabr 2026 tarixlərində San Fransiskoda keçiriləcək “Startup Battlefield 200” müsabiqəsinə qatılacaq. “Mirror Particle”i Abhivyakti Ahuja, “Amazon Robotics”də tanış olduğu Will Song və Thomson Yenlə birlikdə qurub. Startapın uzunmüddətli məqsədi əhali qruplarını təhlil etməkdən ayrı-ayrı insanların davranışını proqnozlaşdırmağa keçməkdir.