Moltbot adlı açıq mənbəli AI agent sürətlə populyarlaşır

    Technote.az “The Verge” platformasına istinadən bildirir ki, texnologiya dünyasında yeni bir süni intellekt agenti sürətlə populyarlıq qazanır. Moltbot adlı bu açıq mənbəli AI aləti istifadəçilərin dediyinə görə “sadəcə cavab vermir, real işlər görür”. İnsanlar Moltbot-dan xatırlatmaları idarə etmək, sağlamlıq və fitness məlumatlarını qeyd etmək, hətta müştərilərlə yazışmaq üçün istifadə edirlər.

    Moltbot birbaşa istifadəçinin cihazında işləyir və WhatsApp, Telegram, Signal, Discord və iMessage kimi platformalar üzərindən çat vasitəsilə ona tapşırıqlar vermək mümkündür. İstifadəçi istədiyi halda sorğularını OpenAI, Anthropic və ya Google kimi AI provayderləri üzərindən yönləndirə bilər. Texnoloji media yazarı Federico Viticci Moltbot-u M4 Mac Mini-də quraraq onu gündəlik fəaliyyətlərinə uyğun audio xülasələr hazırlayan ağıllı bir köməkçiyə çevirdiyini bildirib. Digər istifadəçilər isə agentin özünə animasiyalı üz əlavə etdiyini və hətta xəbərdarlıq edilmədən “yuxu animasiyası” yaratdığını qeyd ediblər.

    Bununla belə, mütəxəssislər ciddi risklərə də diqqət çəkirlər. Moltbot-a tam sistem icazəsi verildikdə o, faylları oxuya, yaza, komandalar icra edə və skriptlər işlədə bilir. Təhlükəsizlik üzrə ekspert Rachel Tobac xəbərdarlıq edir ki, belə agentlər “prompt injection” hücumları ilə ələ keçirilə bilər və bu, istifadəçinin kompüterinin məsafədən nəzarətə götürülməsi ilə nəticələnə bilər.