NASA 'Artemis II" Ay missiyasında iştirak edəcək astronavtları təqdim edib

    NASA "Artemis II" Ay missiyası çərçivəsində Orion adlı kosmik gəminin daxilində yerləşəcək 4 nəfər astronavtı təqdim edib. 4 nəfər astronavtdan ibarət olacaq komandanın komandiri qismində ABŞ Hərbi-Dəniz Qüvvələrinin pilotu Reid Wiseman çıxış edəcək. O, 4-cü nəsil F-14 Tomcat və F/A-18 Hornet qırıcılarını və 5-ci nəsil F35C Lightning II təyyarəsini idarə edib. Komandanın ikinci üzvü pilot Victor Glover olacaq. O, ABŞ Hərbi-Dəniz Qüvvələrinin kapitanıdır.

    Qeyd etmək lazımdır ki, Victor Glover həmçinin 2020-ci ildə SpaceX tərəfindən reallaşdırılmış Crew-1 missiyasının heyətinə də daxil olub. “Artemis II” missiyasının komandasına həmçinin ABŞ-ın Antarktida proqramının elmi rəhbəri Christina Hammock Koch daxil olacaq. O, kosmosda olmuş qadınlar arasında kosmosda ən uzun müddət ərzində qalmış qadın kimi tanınır il. Belə ki, Christina Hammock Koch-un rekordu 328 gün 13 saat 58 dəqiqə təşkil edir.

    “Artemis II” missiyasının 4-cü üzvü isə Kanada Kral Hərbi Hava Qüvvələrinin polkovniki Jeremy Hansen olacaq. O, 4-cü nəsil CF-18 Hornet qırıcı təyyarəsinin pilotu olub. Lakin Jeremy Hansen-in kosmik uçuş təcrübəsi yoxdur. “Artemis II” missiyası NASA-nın “Artemis” Ay proqramının ikinci missiyasıdır. Onun 2024-cü ilin sonunda reallaşdırılması planlaşdırılır. Sözügedən missiya çərçivəsində adları sadalanmış şəxslər Orion kosmik gəmisi daxilində Ay orbitinə yollanacaqlar. Missiyanın ümumilikdə 10 gün ərzində davam edəcəyi gözlənilir.