Netflix Ben Affleck-in süni intellekt startapını 587 milyon dollara satın alıb

    Netflix Ben Affleck-in həmtəsisçisi olduğu süni intellekt startapı InterPositive-i 587 milyon dollar nağd vəsait qarşılığında satın aldığını açıqlayıb. Məlumat şirkətin son tənzimləyici hesabatında yer alıb.

     Netflix bu satınalmanı hələ mart ayında elan etsə də, həmin vaxt maliyyə detalları açıqlanmamışdı. Daha sonra Bloomberg sövdələşmənin dəyərinin 600 milyon dollara çata biləcəyini bildirmişdi. İndi isə məlum olub ki, Netflix InterPositive üçün 587 milyon dollar ödəyib.

   Ben Affleck satınalma elan edilən zaman bildirmişdi ki, InterPositive-in hazırladığı süni intellekt alətləri “insan yaradıcılığının gücünü qorumaq” məqsədi daşıyır. Onun sözlərinə görə, bu texnologiyalar əsasən post-produksiya mərhələsində istifadə olunur və çəkiliş zamanı yaranan problemlərin aradan qaldırılmasına kömək edir. Buraya çatışmayan kadrların tamamlanması, fonun dəyişdirilməsi və ya düzgün olmayan işıqlandırmanın düzəldilməsi kimi imkanlar daxildir.

    Satınalmadan sonra InterPositive-in bütün komandası Netflix-ə qoşulub. Ben Affleck isə şirkətdə baş məsləhətçi (Senior Advisor) vəzifəsini icra edəcək. Netflix-in son maliyyə hesabatına əsasən, platformadakı artıq təxminən 300 film və serialın hazırlanmasında generativ süni intellekt texnologiyalarından istifadə olunub.