NORAD və Google ilə Şaxta babanın dünya turunu canlı izləyin

    Technote.az “TechCrunch” platformasına istinadən bildirir ki, milad ərəfəsində valideynlərin ən çox eşitdiyi suallardan biri budur: “Şaxta baba indi haradadır?” Müasir texnologiyalar və süni intellekt sayəsində bu suala cavab tapmaq artıq çox asandır. Xüsusilə NORAD Santa Tracker və Google Santa Tracker kimi platformalar uşaqlar üçün Miladı daha maraqlı və interaktiv edir.

    Şaxta babanı izləmək ideyası ilk dəfə 1955-ci ildə NORAD tərəfindən ortaya çıxıb. Əvvəllər sadə xəritə animasiyası ilə kifayətlənən bu sistem bu gün mini-oyunlar, videolar, hekayələr və Milad musiqiləri ilə zənginləşdirilib. Son yeniliklər arasında süni intellekt əsaslı funksiyalar xüsusi diqqət çəkir. NORAD Santa Tracker bu il OpenAI ilə əməkdaşlıq edərək bir neçə AI alətini istifadəyə verib. Bu alətlərə selfini animasiyalı elf obrazına çevirmə, oyuncaq ideyaları yaradaraq onları çap edilə bilən rəngləmə səhifələrinə dönüştürmə və ailə üzvlərinin adlarını əlavə etməklə fərdi Milad hekayələri hazırlama imkanı daxildir.

    Platforma həmçinin Cesium-un açıq mənbəli 3D xəritə texnologiyası və Bing Maps peyk görüntüləri əsasında Şaxta babanın yolunu 3D formatda göstərir. “Santa Cam” bölməsində isə Şaxta babanın dünyanın müxtəlif nöqtələrində hədiyyə paylamasını əks etdirən videolar təqdim olunur. NORAD-ın rəsmi saytında Şimal Qütbü Kəndi, geri sayım taymeri, arcade tipli oyunlar, uşaq musiqiləri və YouTube videoları da yer alır. İstifadəçilər Şaxta babanı sayt, mobil tətbiqlər və sosial şəbəkələr vasitəsilə izləyə bilirlər. Daha fərdi təcrübə istəyənlər üçün isə xüsusi telefon xətti də mövcuddur. Zəng edərək könüllülərdən canlı məlumat almaq mümkündür.