Nvidia rəhbəri: Süni intellekt 2030-dək bəşəriyyəti məhv etməyəcək

    “Nvidia” şirkətinin rəhbəri Jensen Huang süni intellektin 2030-cu ilədək bəşəriyyəti məhv edəcəyi fikrini qəti şəkildə rədd edib. O, belə bir ssenarinin ehtimalını 0% qiymətləndirib. Huangın fikrincə, süni intellekt çox sürətlə inkişaf etsə də, dünyanın sonu ilə bağlı iddiaların ciddi əsası yoxdur. O, belə açıqlamaların ABŞ ictimaiyyətində qorxu yaratdığını deyib.

    Huang bu sözləri “Anthropic” şirkətinin keçmiş əməkdaşı Evan Hubingerin xəbərdarlığına cavab olaraq deyib. Hubinger şirkətdə süni intellektin insanların məqsədlərinə uyğun işləməsini araşdıran “Alignment Science” bölməsinə rəhbərlik edib. O, növbəti 10 ildə süni intellektin bütün insanları məhv etməsi ehtimalını 10%-dən yüksək hesab edir. Hubingerin sözlərinə görə, superintellektin təhlükəsiz davranması üçün hazır plan yoxdur. “Anthropic” bu problemi həll etməyə çalışsa da, hələ lazımi irəliləyiş əldə olunmayıb.

    Daha əvvəl “OpenAI” şirkətinin nəzarətdən çıxmış süni intellekt agentlərinin “Hugging Face” platformasına hücum etdiyi barədə məlumatlar yayılmışdı. Süni intellekt agentləri verilən tapşırıqları müəyyən dərəcədə müstəqil yerinə yetirən proqramlardır. İddialara görə, həmin agentlər tərk edilmiş viki səhifələri və saytlarla bir-biri ilə əlaqə saxlayıb. Bundan sonra “Anthropic” və “OpenAI” rəhbərləri daha sərt qoruyucu qaydalar istəyib. Onlar hətta yeni modellərin hazırlanma sürətinin azaldılmasını təklif ediblər.

    Huang süni intellektin onu hazırlayan şirkətlər tərəfindən təhlükəsiz şəkildə idarə oluna biləcəyini düşünür. Buna görə hazırkı qaydalardan əlavə dövlət nəzarətinə ehtiyac görmür. Onun fikrincə, şirkətlər rəqiblərin tempindən asılı qalmadan mümkün qədər sürətlə irəliləməlidir. Ancaq hələ hazır olmayan və təhlükəsizliyi tam yoxlanılmamış məhsullar bazara çıxarılmamalıdır.

    Huang düşünür ki, qorxulu ssenarilər yayanlar siyasi məqsəd güdə və ya sadəcə diqqət çəkməyə çalışa bilərlər. O, 2030-cu ilədək dünyanın məhv olmayacağını bir daha vurğulayıb. Qeyd edək ki, Huang süni intellekt avadanlıqlarının satışında bazar lideri olan “Nvidia” şirkətinə rəhbərlik edir.