Nyu-York metropoliteni cinayətlərin süni zəka ilə proznolaşdırılmasından istifadəni nəzərdən keçirir

     Nyu-Yorkun Metropoliten Nəqliyyat İdarəsi (MTA) şəhərin metro platformalarında cinayət və təhlükəli davranışların proqnozlaşdırılaraq qarşısının alınması üçün süni zəka sistemlərindən istifadə imkanını araşdırdığını bildirib. MTA-nın baş təhlükəsizlik rəisi Michael Kemper qeyd edib ki, idarə metro platformalarında potensial problemləri və ya riskli davranışları aşkar etmək üçün süni zəka kimi texnologiyaları öyrənir və sınaqdan keçirir.

     “Ola bilər ki, biri qeyri-adi, irrasional davranış sərgiləyir... bu, təhlükəsizlik ya polis bölməsinin reaksiya verməsinə səbəb ola biləcək xəbərdarlığı işə sala bilər” - deyə o, bazar ertəsi keçirilmiş MTA-nın təhlükəsizlik komitəsinin iclasında bildirib və əlavə edib ki, bu cür reaksiya hadisənin baş verməsini gözləmədən həyata keçirilə bilər. “O, gələcəyin texnologiyasıdır” - deyə Kemper əlavə edib və MTA-nın hazırda texnologiya şirkətləri ilə birbaşa əməkdaşlıq etdiyini və metro sistemində hansı texnologiyanın işlək ola biləcəyini araşdırdıqlarını bildirib.

     Kemper, MTA-nın hansı şirkətlərlə işlədiyi, süni zəkanın necə tətbiq olunacağı və bu texnologiyanın hansı növ davranışları aşkarlayacağı barədə ətraflı məlumat verməyib. Bununla belə, MTA sözçüsü Aaron Donovan təsdiqləyib ki, yeni sistem üz tanıma texnologiyasından istifadə etməyəcək. “MTA-nın araşdırdığı texnologiya insanları deyil, davranışları müəyyən etmək üçün nəzərdə tutulub” - deyə Donovan bildirib. Bu, MTA-nın süni zəkanı ilk dəfə tətbiq etməsi deyil. 2023-cü ildə qurum süni zəka ilə işləyən nəzarət proqram təminatından istifadə edərək metroda ödənişsiz keçid halları ilə bağlı məlumat toplayıb, onların harada, nə vaxt və necə baş verdiyini izlədiyini açıqlamışdı.

Mənbə: The Verge