Nyu-York uşaqlar üçün süni intellekt çatbotlarına sərt qanun qəbul etdi

    Nyu-York qubernatoru Kathy Hochul çərşənbə günü süni intellekt çatbotlarının 18 yaşdan kiçiklərlə ünsiyyətini məhdudlaşdıran qanunu imzalayıb. Qanuna görə, çatbotlar özünü real insan kimi göstərə və insani emosiyalar hiss etdiyini iddia edə bilməz. Sistemlərin uşaqlara yaltaqlanması və səbəb olmadan emosional suallar verməsi də qadağandır. Çatbotlar əvvəlki söhbətlərdə paylaşılmış şəxsi sağlamlıq məlumatlarından məhdud şəkildə yararlana biləcək.

    Qanun qüvvəyə mindikdən sonra çatbotlar uşaqlara narkotik və alkoqol istifadəsi, qidalanma pozuntuları, özünə zərər və intiharla bağlı məsləhət verə bilməyəcək. Sistemlərin uşaqları sirr saxlamağa çağırması da qadağan olunacaq. Həmçinin açıq seksual məzmun və uşaqların cinsi istismarına aid materiallar 18 yaşdan kiçiklərlə müzakirə edilə bilməz.

    Çatbot şirkətləri istifadəçinin yaşını yoxlamaq üçün ən azı 2 üsul verməlidir. Bu seçimlərdən biri dövlətin verdiyi şəxsiyyət sənədindən asılı olmamalıdır. Böyük xidmətlər arasında yalnız “Anthropic” 18 yaşdan kiçiklərin hesab açmasına icazə vermir. “Google” və “OpenAI” 13 yaşdan yuxarı uşaqların “Gemini” və “ChatGPT”dən istifadəsinə icazə verir. 13 yaşdan kiçiklər də “Gemini” tətbiqlərinə daxil ola bilir.

    “OpenAI” yeniyetmələr üçün ayrıca “ChatGPT for Teens” xidmətini də hazırlayıb. Müstəqil tədqiqatçılar təhlükəsizliklə bağlı bəzi problemlər həll olunana qədər xidmətin dayandırılmasını istəyiblər. Qanuna əməl etməyən şirkətlər hər pozuntuya görə 25 000 dollara qədər (təxminən 42 500 manat) cərimələnə bilər. Ştat sakinlərin ehtimal olunan pozuntularla bağlı şikayət göndərməsi üçün açıq sayt da yaradacaq.

    Kathy Hochul daha əvvəl süni intellektin şəffaflığı və insanlarla emosional ünsiyyət üçün hazırlanan çatbotlarla bağlı başqa qanunları da dəstəkləyib. Qubernator sosial medianın asılılıq yaradan funksiyalarını məhdudlaşdıran qanunu da imzalayıb. ABŞ-də federal səviyyədə vahid süni intellekt qaydaları yoxdur, buna görə ştatlar öz qanunlarını hazırlayır. Xüsusilə uşaqların çatbotlardan istifadəsi ilə bağlı risklər yeni məhdudiyyətlərin əsas səbəblərindəndir.

    Kaliforniya qubernatoru Gavin Newsom da sentyabrda süni intellekt şirkətləri üçün daha sərt təhlükəsizlik qaydaları müəyyən edən qanunu imzalayıb. “Adam’s Law” adlanan qanun “ChatGPT” ilə söhbətdən sonra intihar edən yeniyetmə Adam Raine-in adını daşıyır. Valideynləri çatbotun zərərli davranması iddiası ilə süni intellekt şirkətini məhkəməyə veriblər. Qanuna görə, çatbot hazırlayan şirkətlər hər il uşaqlarla bağlı təhlükəsizlik risklərini qiymətləndirməli və müstəqil yoxlamadan keçməlidir. Onlar böhran hallarında necə cavab veriləcəyini müəyyən edən sistem də yaratmalıdır.